Sesawng leh Khawruhlian inkara Tuirini lei dawh thar hawn a ni

Sesawng leh Khawruh­lian inkara Tuirini lei (bailey bridge) dawh thar chu nimin zing khan Chalhfilh bialtu MLA Dr Ngurdingliana'n a hawng. Lei hi metre 62.65 a sei leh metre 3.74-a zau a ni a ni a, cheng nuai 210 sênga dawh a ni.

Lei hawnna inkhawm chu Sesawng V/C president Ralthan­sanga'n a kaihruai a; Dr Ngur­dingliana chuan, "Chanchin ngah tak, thawnthu sei deuh nei hi mipui mamawhna avangin hmanhmawh taka hawn a ngai a, ruahman dan chuan August 9, 2018-ah hawn tur ni mah se, tun hnai ruahsûr nasa avangin a hêlna a chhia a, hmanhmawh takin kan hawng ta a ni," a ti.

Ngurdingliana chuan, Tuirini lei chu a chhiat tawh avangin a dawh ṭhatna tur sorkar laipuiah da nih il thu sawiin, "Lei dawhna atan cheng nuai 396 min pek bakah, Zero point aṭannga Khawruhlian inkar kawng siamna atan cheng nuai 1271 min pe a, kan lawm hle. Vanduaithlak takin lei dawh zawh ṭêpah a chim a, Mizoram sorakarin cheng nuai 210 min pe leh a, kan lawm hle a ni," a ti a; lei chu PWD-in a rih zawng zawh thei tur chin an biktuk aia rita zawh loh turin lirthei neitu leh khalhtute a chah.

Technical report petu PWD executive engineer Lalhmingmawia tarlan danin, lei hi mipui mamawhna avangin hmanhmawh taka hawn a nih a, load test tih hman a ni lo. Lei hawn hnu nimin vêk khan load test tih a ni.

Sesawng leh Khawruhlian inkara Tuirini lei hi kum 1973-ah dawh a ni a, a him tâwk loh hlauhthawn a nih avangin bialtu MLA hmalaknain kumin February thla khan a thar dawh a ni a, dawh zawh hnaih lamah February 13, 2018 khan a chim a, mi pakhat thiin, mi dang pakhat a hliam. Lei a chim hnuah Mizoram sorkar sum hmangin lei thar an dawh leh ta a ni.

Dr Ngurdingliana hian nimin vêk khan a bial chhung, Suang­puilawn khuaah helipad thar a hawng nghal bawk.