Minister-in B.Ed. zirna thar a hawng

SCERT-a B.Ed. Special Education zirna din thar leh DIET, Aizawla B.Ed. zirna din thar chu nimin khan School Education minis­ter H Rohluna'n SCERT auditorium-ah a hawng.

School Education Minister chuan, SCERT-a B.Ed. Special Education leh DIET-a B.Ed. Edu­cation zir theihna turin kum 2015 aṭangin hmalak a nih thu sawiin, a hlawhtlinna hmuh a ni ta chu lawmawm a tih thu a sawi a, "B.Ed Special Education course zirlaite hi vohbikte enkawlna lamah leh zirtirna kawng­ah dinhmun pawimawh tak an la chelh dawn a, hmarchhak bial mai ni lo, India rama B.Ed Special Education zirna awmchhun Mizoramin a nei hi rahbi pawimawh tak a ni," a ti.

H Rohluna chuan, B.Ed. course hawn thar Mizoram University-in affiliation a pek theih nan te, National Council of Teacher Education (NCTE)-in permission a pek theih nantea hma latute fakawm a tih thu a sawi a; hmun pahniha B.Ed. zir turte chu thu­awihna, taimakna leh thawhrimna nena zir turin a fuih.

B.Ed. Special Edu­cation (Hearing Im­pair­ment & Visual Im­pairment) hi kum hnih zir a ni a, SCERT hnuaiah batch hmasa ber chu tun thlaah ṭan a ni. Zirlai 60 awmin, hearing impairment-ah leh visual impairment-ah zirlai 30 ve ve an awm. B.Ed. Special Course hi Rehabilitation Council of India (RCI), National Council of Teacher Education (NCTE)-te pawmpuinain MZU-ah affiliation tih a ni.

DIET, Aizawla B.Ed. course hawng tur hian April 15, 2018-ah NCTE aṭangin permission hmuh niin, May 28, 2018-ah MZU aṭangin provisional affiliation hmuh a ni a, August 2018-ah class ṭan a ni. MZU thuràwn angin IASE kalphung zawm a ni a; first batch-ah hian zirlai 50 an awm.

SCERT-a B.Ed. Special Education leh DIET, Aizawla B.Ed. course hawn thar hawnna inkhawm hi SCERT director Laldawngliani Chawngthu-in a kai­hruai a ni.