KHAWTHLIR

Thisen pe
Lairam Isua Krista Baptist Kohhran (LIKBK) Ṭhalai Pawl New Siaha Bial, Bualpui NG Bial, Lungzarhṭum Bial leh Siahchangkawn Bialte chuan August 4, Inrinni khan Bualpui NG-I community hall-ah blood donation camp leh AIDS awareness campaign an huaihawt a; Siaha District Hospital tan thisen unit 38 an pe.

MIMER hawng dawn
Mizorama medical college hmasa ber Mizoram Institute of Medical Education & Research (MIMER) vawiin hian chief minister-in a hawng dawn a; hei vang hian MIMER behchhan State Referral Hospital-a out patient department (OPD)-te khâr vek a ni dawn.

Jubilee lawm
Suangpuilawn Branch YMA chuan nimin khan an kum 60-na, diamond jubilee an lawm a, bialtu MLA Dr Ngurdingliana'n a hmanpui. MLA chuan, aia upa zahna chhawm nung zel turin YMA member-te a chah. YMA jubilee hi vawiinah lawm chhunzawm a ni ang.

Facilitation Centre
Staff Selection Commission (SSC) chuan Central Armed Police Force (CAPF), NIA, SSF leh Assam Rifles hnuaiah constable (general duty) lakna tur exam a buatsaih dawn a, August 20, 2018 thleng online registration tih theih a ni. 1st. Assam Rifles chuan Lunglei Zotlanga an battalion headquarters, Lawngtlai leh Siaha-a an hmunahte Facilitation Centre an siam a ni.

CM hoin sawiho
Chief minister Lal Thanhawla hoin nimin khan CMO Cabinet meeting room-ah Zarkawt Community Hall sak tura ruahmanna siamte thlirho a ni a, minister Lal Thanzara'n a telpui. Zarkawt Community Hall sak nan hian NEDP aṭangin cheng nuai 700 hmuh a ni a; main hall/badminton court bakah, gym, office, chowkidar office leh thil dangte dah tum a ni.

CM Relief Fund
Aizawla Nursery Veng Congress unit chuan Chief Minister's Relief Fund-ah Rs. 20,000 an chhung lut.