High Court-a NLUP khinna hnuhdâwh leh NLUP sem thuai Mizoram BJP-in an duh

BJP Mizoram Pradesh Media department chairman Lalrozara chuan, NLUP dawng tur thlan dan Gauhati High Court-a khinna chu a khingtute'n hnûkdâwk se an duh thu leh, Congress kaihhruaiin sum a nei a nih phawt chuan NLUP chu dik takin sem chhunzawm thuai se an duh thu a sawi.

Lalrozara hian nimin khan Aizawl Press Club-ah thuthar thehdarhtute a kâwm a; sorkarin inrelbawlna pangngai a neih piah lama Mizoram sorkarin an duh dan dana sorkar kalphung her danglama NLUP an sem chu dan kalh a nih thu a sawi a, "NLUP hi sorkar kalphung dik hmangin an thlang tur a ni. High Court thubuai thehluttute hian case hnûk kîr thuai se, sorkar hian sem tur pawisa a neih phawt chuan Election Model Code of Conduct puan hma ngeiin a rang thei ang berin NLUP sem rawh se," a ti.

Lalrozara sawi danin, kum 2010-2015 chhungin Mizorama chhungkaw 2,80,000 zinga chhungkaw 1,30,000-in NLUP an dawng tawh a, NLUP atana sum semte chu sorkar laipuiin Mizoram budget chhunga pawisa a pek tur chiang sa SPA, ACA leh CSS funding aṭanga sem a ni. Chutih laiin, NLUP sem aṭanga kum 9 hnuah pawh Mizorama BPL chhungkua 56,584 (19.62 %) an la awm a, state tê zingah Mizoram chu BPL ngah ber a la ni reng tho.

Kum 2010-2015 chhungin NLUP atan cheng vbc. 2873.13 hman ral a ni tawh tih sawiin Lalrozara chuan, "NLUP hian hmeithai leh pachhiate din chhuahna a thlen lo tih a lang chiang. Sorkar flagship programme ni si, tun thlengin Mizoram sorkarin NLUP hlawhtlinpui zat leh hlawhchhampui zat survey a la nei lo a, a resul sawi tur a la nei lo," a ti. Kum 1998 hma lama NLUP kalpui tawhah 7%-in a hlawhtling niin RD department-in an tarlan laiin, India ramah hlawhtlinna 30% tling chin chu hlawhtlinga ngaih a nih thu a sawi.

Lalrozara sawi danin, kum 2018-19 chhungin state budget aṭangin Congress MLA 34 bakah, kum 2013 inthlana Congress candidate tling zo lo mi pali leh Congress party aṭanga bial viltu mi pahnihte hnenah an bial chhunga NLUP dawng tur chhung­kaw 800 thlang tura hriattir an ni. Chu'ng chhungkaw 32,000-te chu Rs. 50,000/ ṭheuh an account-ah thunsak tura tih a ni a, Rs. 50,000 ṭheuh peka sorkar sum sen ngai zat chu vbc. 160 a ni.

India ram pum huap leh state-a sorkar scheme/programme-a ṭanpuina reng reng a dawngtu tur thlangtu chu village panchayat, sorkar official, V/C-te leh gram sabha-te an nih thu sawiin Rozara chuan, "MP leh MLA-te'n an thlang ngai lo. MLA-te'n NLUP dawng tur an thlang dawn a nih chuan Assembly House-ah Allocation of Business siamin, Governor pawmpuiin dan hnuaiah engkim kalpui tur a ni," a ti.

Lalrozara chuan, kumina NLUP dawngtu tur thlan dan chu thil dik lo a nih thu sawiin, "Hetianga sorkar kalphung awmze awm lo, dan zahna awm lo hi India ramah Laloo Yadav-a sorkar lai nen danglamna a awm lo. Mizoram sorkarin administrative reforms a mamawhzia a lang chiang hle," a ti a; BJP chuan an sorkar hunah administrative & economic reforms chu an hna hmasa tur a nih thu a sawi.

MIzoram BJP Media Chairman chuan, tuna NLUP dawng turte chu NLUP dawng tawh, Congress chhungkua deuh vek an nih thu te, an nupui leh fate hminga dawng turte an nih thu te, tun hnaia Congress party-in mi an lawm luh an sawite chu NLUP an pek turte vek an nih thu a sawi bawk.