Chin state Chief Minister a lo zin dawn
Myanmar-a Chin state chief minister Salai Lian Luai chu naktuk Nilaini hian Mizoramah a rawn zin dawn a; a lo zin huna lo dawnsawn dan tur ngaihtuahin nimin khan Champhaiah additional DC Liansangzuala Chhakchhuak hoin sorkar offical-te an ṭhukhawm.
Meeting-ah hian, Chin state CM dawnsawn dan tur leh a kaihhnawih thil hrang hrang an sawiho a; hun teptêr tak karah inbuatsaihna kalpui ni mah se, India leh Myanmar ram inlaichìnna tihngheh lehzual a nih theihna turin theihtawp chhuaha lo dawnsawn ni se, an ti. Zokhawthara Land Custom Station hall-ah inkawmna buatsaih an rél bawk.
Ruahman dan chuan, Chin CM Salai Lian Luai hi Nilaini zing dar 8:30-ah Rih-Zokhawthar ramri kânin India ramah a rawn lut dawn a; India sorkar aiawhin Commmerce & Industries minister H Rohluna hoin lo hmuah tum a ni. Salai Lian Luai lo zin tur hi tun hnaia India sorkar leh Myanmar sorkar inremna ziah, ‘Agreement on Land Border Crossing with Myanmar’ tihhlawhtlinna leh a taka entirna tur a ni a; Mizoramah riak loin, Mizoram sorkar hotute nen an inkawm zawhah a haw leh nghal dawn a ni.
India leh Myanmar sorkarte'n tun hnaia ramri kâna inkalpawhna chungchanga inremna an siam ang chuan, Zokhawthar chu India, Myanmar leh ram dang passport leh visa dik tak neite tana luh leh chhuahna hmun, International Point atan ruahman a ni.