Mipui hmaah Pu Hawla'n thu dik lo a sawi - Tlanghmingthanga

MNF vice president R Tlanghmingthanga chuan chief minister leh Congress party president Lal Thanhawla'n amah lala siamtu mipui hmaah thu dik lo a sawi niin a sawi.

Nimina Mizo Hnam Runa inkhawmah thu sawiin R Tlanghming­thanga chuan, "August 3, 2018 khan CM Pu Lal Thanhawla'n amah lala siamtu Mizo mipui hmaah thu dik lo pathum a sawi lang a; chu'ngte chu - vai hlau mi chu ni ila lal ṭhutthleng ka kian lo ang tih te, India hnam leh sakhuate zawm turin MNF-te India hnuaiah an inpe tihte leh, MNF-in Mizo nationalism hi Arjun Singh-a hnenah an hralh, tihte a ni. Hengte hi thu dik lo vek a ni," a ti.

Tlanghmingthanga chuan, "Mizo nationalism chîm ral tur chuan Indian nationalism rilru pu kal khawm Indian National Congress zinga kan tel chiah hian Mizo nationalism chu chîmralin a awm nghal a ni," a ti a; CM Lal Thanhawla'n Mizo nationalism beihna hmanrua atana a hman chu mak a tih thu a sawi.

Lal Thanhawla duh dana thil kal chu ni se, CM a nihna titawpa Mizoram state-a hlankai a nih a rin loh thu sawiin Tlang­hmingthanga chuan, "Mizoram hi state puitling a lo nih tâk avang­in UT sorkar a tawp nghal a, UT sorkar hruaitu CM, minister leh MLA zawng zawngte hun (term) tihtawp nghal vek a ni. State sor­kara rorel turin thuneitu sorkar laipuiin interim sor­kar, Pu Laldenga CM-na hnuaiah a siam a, Pu Hawla pawh deputy CM atan dah a ni," a ti.

MNF Vice President chuan, state chief minister ṭhutthleng chu UT chief minister duh dana ruat emaw, inken emaw theih a ni lo tih chu CM ni mek Lal Thanhawla'n a hre chiang ber tih sawiin, "Mipui thu dik lo min hrilh fo hi sim tawh se kan duh hle. India sorkar khan UT kha titawpin state-ah a hláng kai a, UT-a CM ni mek kha state-ah Dy. CM atan an dah a ni," a ti. Hemi rual hian, Lal Thanhawla'n vai a hlauh leh hlauh loh an hriatpui lo tih a sawi.

R Tlanghmingthanga chuan, Assam sorkarin National Register of Citizens (NRC) a tihchhuah vanga an ṭhenawm state dangte'n hma an lak mek laia Mizorama Congress sorkar a ngawi tlat chu pawi an tih thu sawiin, "Rang taka checkgate siam tur leh ILP pawh uluk leh fimkhur zawka kalpui ni se kan duh," a ti.