MLA pêk RT-PCR khawl LCH-ah dah lêt a ni

Health secretary H Lalengmawia chuan nimin chawhma lam khan order chhuahin, Congress Legislature Party (CLP) leader Zodintluanga Ralte-in Lunglei Civil Hospital (LCH) tana RT-PCR kháwl a pek, Lunglei DC pisaa awm mek chu LCH-ah a rang thei ang bera dah turin a hriattir.

Health Secretary order-a tarlan danin, RT-PCR chungchanga hmalak zel dan tur chu a ṭul anga ngaihtuahzel tur a ni. Thuthar thehdarh­tute zawhna chhángin LCH hotute chuan, DC nen an sawiho hnuah RT-PCR kháwl chu an lâk tur thu an sawi. Nimin tlai khan khawl hi LCH-ah laklet a ni.

LCH hotute chuan, him taka kawl ṭha tura an tih angin RT-PCR kháwl chu an kawl phawt tur thu an sawi a, "Engtin nge tih zel tur a nih kan sawi thei lo. Hotute thu kan ngaichâng zel ang chu," an ti. Thorang bialtu MLA Zodintluanga Ralte chuan June 26, 2020 khan LCH-a dah tur RT-PCR chu Lunglei DC hnenah a hlân a, chumi ni vêk chuan LCH-ah phurh phei nghal a ni. Mahse, LCH lamin an kawl ngam loh avangin DC office-ah an dah lêt leh a, khawih chêt lohin DC pisaah a awm ta reng a ni.