NHM-a thawkte'n badge dum bel dawn
National Health Mission (NHM) hnuaia contract-a thawkte chuan hlawh an lâk theih loh avangin, lungawi lohna lantir nan vawiin aṭang hian an hnathawhnaah badge dum an bel dawn a; hlawh pe thuai turin sorkar an ngen.
NHM Contractual Association Mizoram (NHMCAM) chuan thuchhuah siamin, hlawh an lâk theih loh vanga lungawi lohna lantir nan July 3-10, 2020 chhung badge dum an bel dawn thu an puang a; "Hemi chhung ngeia kan ngennate tihhlawhtlin a nih loh chuan kum tam tak kan lo tawrh tawhna avangin na zawka hmalak a ni ang. Mipuite'n kan harsatna min hriatpui turin kan ngen lâwk a ni," an ti.
NHMCAM chuan, Covid-19 lêng vangin khawtlang mipui, tlawmngai pawl leh task force-te an buai hle tih sawiin, frontline-a damdawi lama thawktute pawh an hah hle tih an sawi a; frontline-a damdawi lama thawktute zinga a tam ber chu NHM hnuaia thawk an nih thu leh, thawktu tam zawkin kumin May leh June thla hlawh an la la lo a, ṭhenkhat phei chuak April aṭangin an la lâk loh thu an tarlang.
NHM-a thawkte'n an ngente
• Ministry of Health & Family Welfare (MoHFW)-in Record of Proceeding (RoP) approval 2020-21 min pek anga April aṭanga June thla kan hlawh kan lâk nghal theihna turin NHM pawisa an hrên hi release nghal rawh se.
• MoHFW-in RoP approval min pek anga hlawh leh hlawh punna min la pek lohte min pe nghal rawh se.
• Regular post ruak a awmin NHM hnuaia thawkte hi MoHFW duh dan anga a ngheta luh theih dan tur ruahmanna min siamsak rawh se.
NHM Contractual Association Mizoram (NHMCAM) chuan, NHM hnuaia thawkte'n kum eng emaw zat harsatna an tâwk tawh ṭhin tih sawiin, "Kan hlawh pawh a hun takah kan la ngai lo a, a cháng phei chuan thla ruk laite hlawh la thei loin kan awm ṭhin," an ti a; an dinhmun chu mipuiin hriatthiampui se an duh thu an sawi.
NHMCAM- tarlan danin, Mizoramah NHM hnuaiah doctor, nurse, health worker, laboratory technician, pharmacist, X-Ray technician, driver leh office staff eng emaw zat awmin, an vaiin mi 1,665 vel an ni. NHM pawisa sorkar laipui
aṭanga lo kalte kum 2013-14 aṭanga state sorkar (Treasury) kaltlanga pek a nih aṭangin state sorkarin rei tak a hréng ṭhin a; chutihlaiin, inkaihhruainaah chuan, state sorkara sum a luh aṭanga ni 15 chhungin NHM account-ah pek chhuah tur a ni.
NHM hnuaia thawkte ramri leh damdawi-inah ṭhahnemngai leh hah taka an thawh mek laiin hlamchhiah an ni fo tih sawiin NHMCAM chuan, "Kum 2019-20 chhunga NHM tana pawisa lo kal aṭangin vawiin thleng hian cheng nuai 3,865 (Central sorkar aṭanga lo kal leh state sorkar tum tur 10%) zet Mizoram sorkarin a la hréng a, hei vang hian NHM hnuaia thawktu tam zawk chuan May leh June thla hlawh an la thei lo a, ṭhenkhat chuan April 2020 aṭangin an la thei lo tawh a ni," an ti.