Mizoram páwn aṭanga rawn lutte Swab sample endik leh ṭan a ni
Nimin aṭang khan state páwn aṭanga Mizorama rawn lutte rapid antigen test (RAT) hmangin Covid-19 an vei leh vei loh endik leh ṭan a ni a, Mizoram luhka pakhat Saihapui-V khuaah erawh chuan endik a la ni ve lo.
Mizoram sorkar chuan January 5, Nilaini khan notification tichhuakin, state páwn aṭanga Mizorama lutte chu darkar 72 (ni thum) aia hlui lo swab sample endika negative result nei tih loh chu an luhna hmun (entry point)-ah rapid antigen test (RAT) hmangin swab sample endik vek tawh tur a nih thu a puang.
Sorkar thuchhuah tarlan danin, State Level Expert Team on Covid-19 Management-in a rawtna a siam angin, state páwn aṭanga Mizoram luhna entry point hrang hrang kaltlanga Mizorama lut turte zawm tur kaihhruaina, standard operating procedure (SOP) siam danglam a ni a; thuchhuak thar hian October 14, 2021-a SOP tihchhuah tawh a luahlân a, SOP dang a awm leh hma chuan hman tur a ni.
Vanglaini thudawn danin, RAT hmangin Lengpui Airport bakah, Vairengte, Bairabi leh Kânhmunah state páwn aṭanga Mizorama rawn lutte RAT hmanga endik zel a ni a; Vairengteah chuan mipui ni tin mamawh (essential commodity) phurte erawh endik a ni lo.
Saihapui-V aṭanga Vanglaini thu dawn danin, Saihapui-V kaltlang hian lirthei hmanga Mizorama lut an awm ve reng a; mahse, an khaw paltlanga Mizorama lutte chu RAT hmangin endik an ni rih lo a ni.
Mizorama lut turte tana kaihhruaina
1. Mizoram Home department-in dan zawm tur a duan tawhte zawm ngei tur a ni a, entry point-ah RAT hmangin sample test ngei tur a ni.
2. RAT-a positive-te chu khung hrangin, Covid-19 enkawl dan tur siam sa angin enkawl zui tur.
3. RAT-a negative, Covid-19 symptom nei lote chu khung hran an ngai lo.
4. RAT-a negative, Covid-19 symptom neite chu RT-PCR/TrueNat hmanga endik leh tur a ni a, an negative nawn a nih pawhin ni nga chhung inkhung hran tur niin, inkhung hran aṭanga ni nganaah RT-PCR/TrueNat hmangin sample endik nawn tur.
5 Mizorama lut tur, Covid-19 symptom nei lo, swab test ngai lote:
i) Mizoram luh hma darkar 72 chhunga RT-PCR/ TrueNat/ CBNAAT-a swab test negative report neite.
ii) Mizoram luh hma thla thum chhunga Covid-19 positive, discharge certificate neite.
6. No. 5-in a sawi certificate/ report nei pawh ni se, Covid-19 symptom neite chu RAT hmanga endik tho tur a ni.