Champhai DC-in kuhva lâk luh Khap thu a puang nawn

Champhai district magistrate Maria CT Zuali chuan January 5, Nilaini khan thupek chhuahin, Myanmar aṭanga kuhva leh thing­hmarcha lâk luh leh phurh chhuah khap a nih thu a puang nawn.

Champhai Bawrhsap chuan, sorkar laipui Minis­try of Home Affairs (MHA) lehkha no.1/32/2019-BM-II dt. 13.11.2019 leh Mizo­ram sorkara Home depart­ment lehkha no. D.32021/9/2019-HM dt. 2.12.2019 ten dan kalha Myanmar aṭanga kuhva leh thinghmarcha lak luh leh phurh chhuah khap tura a tih bawhzuina kal zelah CrPC 1973 (Act II of 1974) Section 144-in thuneihna a pek angin, Champhai district chhunga Customs/ Police/ Assam Rifles check­gate leh kawng ṭum dang aṭanga dan ding lai hrang hrang kalha kuhva leh thinghmarcha lak luh leh phurh chhuah khap tlat a nih thu a puang.

Sorkar thuchhuah tarlan danin, Champhai DM khapna thupek hian e-waybill lem hmang leh Customs duty leh chhiah (tax) chawina lehkha awm loa bungraw phurh a khap tel a; thupek chhuah a aṭanga thla hnih chhung a huam dawn a, thupek zâwm lote chu IPC Section 188 hmanga hrem theih an ni.