LMC inthlan hun tur hriat a la ni lo ; A ṭul ang kan buaipui mek - Dy. CM

Urban Development & Poverty Alleviation (UDPA) changtu deputy chief minister Tawnluia chuan, Lunglei Municipal Council (LMC) inthlan buatsaih hun tur hriat theih a la nih loh thu a sawi a, "A ṭul ang kan buaipui mek," a ti.

Vanglaini palai zawhna chhangin Dy. Chief Minister chuan, Cabinet-in LMC din a pawm aṭangin dan anga buaipui ngaite buaipui nghal char char a nih thu a sawi a, "Dan ang thlapin kan la kal char char. Buaipui ngai a tam a, a rang thei anga tihfel tumin theihtawp kan chhuah," a ti a; buaipui ngaite an tihfel hnuah inthlan chu State Election Commission (SEC) kutah a awm tur thu a sawi.

Tawnluia chuan, ward ramri chingfeltu tur Delimitation Committee din tura hmalak a nih mek thu sawiin, "Committee din a nih hnuah ward ramri tur an tifel ang. Chumi hnuah electoral roll buaipui a ni ang a, ramri tihfel a nih hma chuan electoral roll buatsaih theih a ni lo," a ti.

Inthlan hun tur sawi lâwk theih a nih loh thu sawiin Tawnluia chuan, "Buaipui ngaite buaipui fel a nih hun hunah inthlan lam kan hawi thei ang," a ti a; thil ṭulte tihfel a nih huna inthlan buatsaih thuai chu an duh dan a nih thu a sawi.

Deputy Chief Minister chuan, LMC pisa tur an buaipui mek tih sawiin, "Saikuti Hall kan tinzâwn deuh a, mahse, UDPA Director-in a enfiah hnuah singsak leh buaipui ngai a tam avangin ṭha kan ti leh lo. Hual dang kan nei leh a, buaipui mek a ni. Pisa peih a nih hunah chuan engkim tih zung zung a awlsam dawn a ni," a ti.

Lunglei High Power Committee chungchang zawhna chhangin Tawnluia chuan, "Tun dinhmunah chuan LMC pawh a la function lo a, HPC chungchang eng mah ngaihtuah a la ni lo," a ti a; a taka LMC a kal hunah HPC chungchang chu sorkarin a ngaihtuah tur thu a sawi.

Tarlan tawh angin, November 16, 2021-a chief minister Zoram­thanga hoa Council of Minister ṭhukhawm chuan LMC din an remti a; ruahman dan chuan LMC-ah hian ward 11 a awm dawn a ni.