State páwn aṭanga lut zingah Covid-19 vei mi 69 hmu tawh ; Dubai aṭanga hawte endik nawn dawn

Kumin January 3 aṭang khan ni tin state páwn aṭanga Mizorama rawn lut zingah Covid-19 vei hmuh chhuah an awm a, nimin bikah mi 38 hmuh niin, an vaiin mi 69 an tling tawh. State páwn aṭanga haw zinga ram dang (foreign) aṭanga rawn lut mi pahnih chu Omicron vei an nih leh nih loh enfiah a ni dawn.

Mizoram sorkarin ni tina Covid-19 positive report a tihchhuaha a lan danin, kuminah January 3 aṭang khan state páwn aṭanga rawn lut zingah Covid-19 vei hmuh ṭan a ni a; Lengpui Airport-a RAT hmuh chhuahte chu Delhi leh Kolkata aṭanga haw an ni tlangpui.

January 3 khan Lengpui Airport-ah hripui vei mi pathum hmuh chhuah a ni a, January 4-ah mi 26 hmuh chhuah niin, BSF sipai 21 tih loh chu Lengpui Airport kaltlanga Delhi leh Kolkata aṭanga hawte an ni.

January 5, Nilaini khan Lengpui Airport kaltlanga state páwn aṭanga rawn haw zingah Covid-19 positive mi pathum hmuh chhuah an ni a, an zinga pahnih chu Dubai, United Arab Emirates aṭanga rawn haw an ni. Dubai aṭanga haw mi pahnihte chu an swab sample Lengpui Airport-ah lak a ni a, mahse, ZMC RT-PCR laboratory-ah endik a ni thung.

Nimin khan Lengpui Airport-ah hian mi 38 hmuh chhuah leh a ni a, tun hnaia hmuh chhuah tam ber a ni. Lengpui Airport-a police hotute chuan, Mizoram sorkarin SOP thar a tihchhuah angin nimin aṭang khan state pawn aṭanga haw, endik tura tih zawng zawng endik ṭan a nih thu an sawi a, "Flight paruk a awm a, passenger 557 awmin, chu'ng zinga mi 398 chu sample test a ni," an ti.

Covid-19 thupuangtu Dr Pachuau Lalmalsawma chuan Vanglaini zawhna chhángin, Dubai aṭanga rawn haw mi pahnihte chu Omicron vei an nih leh nih loh hriat nan an swab sample lain, National Institute of Biomedical Genomics, Kalyani, West Bengal-ah an thawn dawn tih a sawi a; state pawn aṭanga tun hnaia haw, Covid-19 positive dangte sample erawh thawn tumna a awm rih lo tih a sawi bawk.