KHAWTHLIR
RD hotute kâwm
Rural Development minister Lalruatkima chuan January 5, Nilaini khan Ministry of Rural Development hotute New Delhi-ah a kâwm. Mizorama RD block hrang hranga Rurban cluster siam belh chungchang te, Pradhan Mantri Krishi Sinchayee Yojana (PMKSY) Version 2.0 leh Mizoram mamawh leh hmachhawpte a sawipui a ni.
CYMA Office
Central YMA Office chu kum 2022 atan nimin khan hawn ṭan a ni a, office hawn ṭanna pual hian nimin chawhnu dar 2 khan CYMA Committee Room-ah inkhawm tawi buatsaih a ni, inkhawm kaihruaitu CYMA general secretary Prof. Lalnuntluanga chuan YMA pisa chu YMA hmel lanna a nih avangin thawktute chu theihtawp chhuah chhunzawm zel turin a fuih.
Zirlai chawimawi
Mizo Students Union, Thingsai chuan nimin khan Saitlang Romual, Thingsaiah kum 2021 chhunga bachelor degree, master degree leh M.Phil zir zote hnenah chawimawina thuziak an hlan a, prominent citizen-te an chawimawi bawk. Chawimawina hun hi Hnathial district election officer Lalneihthanga Colney-in a hmanpui a ni.
Tanpuina pe
Home minister Lalchamliana chuan a bial, Hrangturzo huam chhunga tun hnaia Covid-19 vei thar tamna Sialsir khua leh East Lungdar hnenah Rs 40,000 ve ve, Sailulak khuaah Rs 20,000 leh Mualcheng khuaah Rs 10,000 a pe a; Mualcheng leh Sailulak khaw tan pulse oxymeter a pe bawk.
Kawng khâr dawn
PWD chuan vawiin aṭanga January 9, Pathianni thlengin zing dar 9 leh tlai dar 4 inkarah Raj Bhavan chhim lam gate leh PCCF Office, Tuikhuahtlang inkar kawng an siam dawn a, hei vang hian hna thawh chhungin kawngpui khâr a ni dawn. Traffic SP Rodingliana Chawngthu chuan, hnathawh tibuai thei tura kawngpui sira lirthei leh bungrua dah phal a nih loh thu a tarlang.