Union Minister hoin hmarchhaka loneitute harsatna leh hmachhawpte sawiho a ni

Union minister for Agriculture Narendra Tomar leh DoNER minister G Kishan Reddy hoin nimin khan video conferencing kaltlangin hmarchhak state-a loneih leh thar chhuah chungchang leh a kaihhnawiha hmachhawp leh harsatnate sawiho a ni a, Mizoram aṭangin Agriculture minister C Lalrinsanga hoin department hotute an tel.

C Lalrinsanga chuan, Ministry of Agriculture hnuaia Department of Agriculture & Farmer's Welfare-in GBS 10% sum ruahman chu kum tàwp dawn hnaiah an tihfel ṭhin avangin ruahmanna thehluha sum pek chhuahah harsatna a awm ṭhin thu a sawi a, sum ruahmante a hma lama pek ṭhin ni se a duh thu a thlen.

Mizorama oil palm chìn hlawhtlin dan leh sorkar hmalaknate sawiin Minister chuan, "Sorkar laipuiin oil palm chungchanga scheme thar a tlangzarh, New Mission for Oil Palm (NMEO-OP)-ah beiseina sang tak kan nei. Oil palm rah phurh chhuah nan inkalpawhna kawng ṭha Mizoramin a mamawh hle," a ti.

C Lalrinsanga chuan, tlang ram loneih bànsan nan tlang ramte terrace-a siam a pawimawh thu sawiin, "Tlang ram terrace-a siamin, lei hànna luang ral mai tur eng emaw chen a veng thei a ni," a ti a; terrace siamin buh leh thlai chìn nan ram ṭha tak a siam belh thei bakah, sik leh sa inthlak danglam ven nan thil ṭha a nih thu a sawi.

Loneitute'n an thlai tharte awlsam leh rang taka an phurh thei nan farm road/link road neih a pawimawh thu sawiin Minister chuan, lo leh huan inkalpawhna tur project Mizoram sokarin a thehluh chu ngaih pawimawhsak turin thuneitute a ngen.

Ṭhutkhawmah hian sorkar laipui hotute'n hmarchhaka loneitute tana Ministry of Agriculture-in ṭanpuina a pek dan leh scheme hrang hranga hmarchhak state-te thlen chinte an tarlang a ni.