RUSA zirtirtute hlawh tur pek theih nan Mizoramin buaipui ngai 99% vel a zo tawh

Higher & Technical Education (HTE) minister Dr R Lalthangliana hoin Mizoram sorkar hnuaia college principal-te chuan nimin khan Secretariat conference hall-ah New Education Policy (NEP) 2020 chungchang an sawiho. Ministry of Finance-in RUSA hnuaia zirtirtute hlawh tur a pek chhuah theih nan Mizoram sorkarin inkaihhruaina tharin a phût ang 99% vel a peih tawh a, tun kar chhungin peihfel beisei a nih thu tarlan a ni.

Ṭhutkhawmah hian Mizoram sorkarin RUSA-1 a khâr tawh thu leh RUSA-2 pawh a hmáwr bâwk ṭêp a nih thu tarlan a ni a, "RUSA hnuaia zirtirtute hlawh chungchangah sorkar laipui vawi eng emaw zat dàwr a ni tawh a, a hun takah zirtirtute hlawh tur sum release a nih theih nan sorkar laipui phût angin utilisation certificate a hun takah thehluh a ni," an ti.

Ministry of Finance-in OM thar a tihchhuahah sum pek dan kalphung a thlak danglam vek avangin inkaihhruaina thar zâwm kim lo chu ministry tinah funding pek tlai a ni tih an tarlang a, "Minister Dr R Lalthangliana’n zirtirtute hlawh tur fund an pek chhuah thuai theih nan vawi tam tak ministry a dàwr a, DO letter leh phone hmang pawhin vawi tam tak a dawr. Finance Ministry inkaihhruaina tharin a phût ang 99% vel Mizoram sorkarin a peih tawh a, tun kar chhungin 100%-a peih theih beisei a ni," tiin an tarlang.

NEP 2020 hmang turin Mizoram sorkar hnuaiah HTE Commissioner kaihhruai task force din a nih thu tarlan a ni a, Mizoramah NEP hman ṭan a nih theih nan inkaihhruaina pawimawhte an zirho nghal a ni.

NEP tharah kalphung inthlak a tam dawn tih an sawi a, "College zirtirtute bakah mipui mimirah inhrilhfiahna leh sawihona zau zawk neih a ṭul dawn," an ti a; Mizorama college-te'n affiliation a neihna Mizoram University pawhin task force dinin hmalakna thui tak an neih tawh thu an sawi a, NEP hnuaia Mizoramin hmalakna chak leh zualin kalpui se, NEP-in inkaihhruaina a siam zingah kalpui theihte kalpui ṭan ni se, an ti.

National Assessment and Accreditation Council (NAAC) accreditation la nei ngai lo college pahnih leh accreditation hmu tawh zingah validity tàwp tawh an awm thu tarlan a ni.

College-a thawktu (teaching staff leh non-teaching staff) indaih lohna chungchangah minister R Lalthangliana chuan, college tinte dinhmun chiang tak ziaka sorkara hriattir turin principal-te a chah.