Lunglei tleirawlte Covid vaccine pe ṭan

Lungleiah nimin ṭanga khan kum 15-17 inkarte hnenah Covid-19 vaccine Covaxin pek ṭan a ni a, vawiin aṭangin district chhung khaw hrang hrangah pek chhunzawm a ni ang. Health department chhinchhiah danin, Lunglei district-ah hian kum 15-17 inkar vaccine la thei mi 9,532 an awm a ni.

Covid-19 vaccine pek ṭanna pualin Lunglei DC Kulothungan A hoin inkhawm buatsaih a ni a; Kulothungan chuan, Lunglei district chu Covid vaccine pek chhuahah Mizorama ti ṭha berte zinga mi a nih thu sawiin, an district-ah dose khatna 94.9% leh dose hnihna 85.1% pek a nih tawh thu a sawi.

Lunglei district-ah hian tleirawl kum 15-17 inkarte hnenah Lunglei High School-ah Covid vaccine pek a ni a; vawiin aṭangin Pukpui, Serkawn, Zohnuai, Bazar Veng, Venghlun, Zobawk, Electric Veng, Farm Veng, Ramthar Veng, Salem Veng, Lunglawn, Luangmual, Theiriat, Vaisam, Rúntung, Pachang leh Hauruangahte pek ṭan tum niin, hmun dangah pawh pek zel tum a ni.