Phùl lem phah tur lungphùm phúm
Sports & Youth Services minister Robert Romawia Royte chuan nimin khan Lengpui Football Ground-a phùl lem (airtificial turf) phah turin lungphùm a phúm.
Robert Romawia Royte chuan, sport infrastructure hrang hrang siam turin sorkarin nasa taka hma a lak thu sawiin, "CM leh Dy CM-te phûrpuina zarah Aizawl Smart City project-ah pawh sports sector-ah hmasawnna lian tham a insehmùr mek. Sports department chuan hun hmasa lama sum a hmuh ngai lohna central ministry pathum aṭangin sum a hmu ṭan a ni," a ti.
Robert Romawia chuan, hmasawnna ruhrel a pawimawh angin infiamna tihhmasawn lam pawh a pawimawh tih sawiin, "Awmze neia hmasawn turin coach training leh sports school changtlung tak tak din a ni dawn a, central sorkarin sum pawh min sanction sak tawh," a ti. Lungphùm inkhawmah hian bialtu MLA H Lalzirliana leh Sports secretary H Lalengmawia te pawhin thu an sawi.
Inkhawma tarlan danin, khelmual hi a dung metre 110 leh a vâng lam metre 74 a ni a, cheng nuai 500 séngin phùl lem phah tur a ni. A phahna tur sum chu Ministry of Sports & Youth Affairs-in Khelo India Scheme aṭangin a tum vek (100%) dawn a ni.