Covid-19 vei hmuh thar zingah Ram páwn aṭanga haw 2 an tel

January 5, Nilaini khan Mizoramah Covid-19 vei mi 502 hmuh chhuah a ni a, November 17, 2021 hnua hmuh tam ber ní a ni. Hmuh thar zingah ram páwn aṭanga haw pahnih an tel. Nimin khan hripui vei dam tawh mi 133 chhuahtir an ni a, hripui vanga thi an awm lo.

Covid-19 vei hmuh tharte chu mipa 220 leh hmeichhia 282 an ni a; ZMC laboratory-a hmuh chhuah 30, TrueNAT hmanga hmuh 26, RAT hmanga hmuh 435 leh Fluorescent Immunoassay (FIA) hmanga hmuh 11 an ni. Swab sample endik zat aṭanga hripui vei hmuh zat chu 8.63% a ni.

Sorkar thuchhuah tarlan danin, Covid-19 positive hmuh thar mi 502 zingah state páwn aṭanga rawn lut hlim mi pathum an tel a; Dubai aṭanga haw pahnih leh Kolkata aṭanga haw pakhat niin, Lengpui Airport-a hmuh chhuah an ni.

IDSP record angin, Mizoramah Covid-19 vei 1,43,193 hmuh chhuah a ni tawh a, mipa 68,924 leh hmeichhia 74,269 an ni. Nimin tlai dar 5 thleng khan mi 1,40,200 (97.91%) chhuahtir an ni tawh a, mi 554 (0.39%) thi tawhin, enkawl mek mi 2,439 (1.70%) an awm.

January 5, Nilainia Covid-19 vei hmuh thar mi 502 zingah symptom nei mi 353 awmin, 70.32% a tling a, mi 149 erawh chu symptom nei lo an ni thung.

Nilaina swab sample endikna district 11 zingah positivity percentage 10% aia a sànna district panga a awm a, a sànna ber Serchhip district-ah 30.91% a tling. Positivity rate 10% chung lam district dangte chu Saitual 17.28%, Champhai 16.05%, Hnahthial 10.57% leh Siaha 10.29% a ni.

Serchhip district-a East Lungdarah Covid-19 positive 39, symptom nei vek hmuh belh a ni a, January 4 khan mi 47 hmuh a lo ni tawh. Baktawngah mi 21 symptom nei vek, Bungtlangah mi 19 symptom nei vek leh Sailulâkah mi 18 hmuh a ni bakah, Khawzawl district-a Kawlkulhah mi 24 symptom nei vek hmuh a ni bawk.

IDSP tarlan danin, nimin tlai dar 5 thleng khan hripui vei dam tawh mi 133 chhuahtir an ni a; district tina chhuak zat chu - Aizawl leh Mamitah 32 ve ve, Lungleiah 23, Serchhipah 17, Kolasib leh Khawzawlah 12, Champhaiah pali leh Hnahthialah pakhat a ni.

Kum 2011 chhiarpui aṭanga chhûtin, Mizorama Covid-19 vei hmuh tawh 1,43,193 chu mi 1,000 zelah hripui vei mi 130 an awm ang a ni a; mi 1,00,000 zela Covid-19 vangin mi 50 an thi tawh ang a ni tih sorkar thuchhuakin a tarlang.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. January 5, 2021 thlenga swab sample endik tawh 15,20,815 aṭanga RT-PCR hmanga endik zat percentage chu 21.75 a ni a, RAT hmanga endik zat chu 72.40% a tling.