Medical college MIMER hawn a ni ; College ṭha ber ni turin bul kan ṭan - CM
Mizoram medical college hmasa ber, Mizoram Institute of Medical Edication and Research (MIMER) chu nimin khan chief minister Lal Thanhawla'n a hawng. Chief Minister chuan, "Lalpa'n thil ropui tak min tihsak a, kan lawm hle a ni... India rama medical college ṭha ber ni turin bul kan ṭan a ni," a ti.
CM Lal Thanhawla chuan, Pathianin Mizoram tan thil ropui tak a tih avangin an thupui chu, 'Lawm chung Lalpa rawng i bâwl ang u,' tih a nih thu a sawi a, "Kan hotute min hruaina a ropui a, Lal Isua'n, 'Keimah lo chuan engmah in ti thei si lo,' a ti a, Lal Isua nen chuan engkim a tih theih a ni," a ti a; Congress sorkar chu mite sawichhiat leh relbúr ni mah se, a lam ṭang programme an ngaihtuah ṭhin tih a sawi.
Lal Thanhawla chuan, Isua'n tihdam rawngbawlna a ngai pawimawh tih sawiin, "Kan sorkar apiangin Health department tihchak kan tum a, district hospital tinah CT Scan leh khawl pawimawh kan nei vek tur a ni, kan ti a ni," a ti. Falkawnah referral hospital din tumin kum 1997 velah ruahmanna an siam a, kum 1998-ah sorkar laipuiin cheng vbc. 40 a rawn sanction hman tih sawiin, "Mah se, kan awm ta lo a, kan tum ang a ni ta lo. Kan sorkar leh hnuah kan tipuitling ta a ni," a ti.
MIMER chu India rama medical college ṭha ber ni tura an buatsaih thu sawiin CM Hawla chuan, "Medical college ṭha ber ni turin bul kan ṭan a, medical college
ṭha ber a ni thei ngei ang tih kan ring," a ti a; Mizoramin medical college a neih tak vanga a lawmawmzia mipuiin hria se a duh thu sawiin, "A changtlun lohna lam aiin, a lawmawmna lam ngaihtuah ila a, zawi zawiin kan la tichangtlung zel dawn a ni," a ti.
Lal Thanhawla chuan, MIMER ṭhan zelna turah faculty leh zirlaite an pawimawh tih sawiin, "A bul ṭan ṭhat hi a chanve zawhna a ni tih hria a, theihtawp chhuah turin faculty leh zirlaite ka chah a, duhsakna ka hlan a ni," a ti a; "He hmun hi tuna sorkar lai ta ni loin, Mizote ta a ni. India rama chhuan tlak ni turin hmalak zel kan tum," tiin, Mizoram mipuite chu a ṭha lo lai siamṭhatpui zel turin a sáwm.
Mizoram buai laia Mizote leh Mizoram mamawh ber chu remna leh muanna a nih thu sawiin Lal Thanhawla chuan, "Tuboh leh dolung inkarah huaisen takin kan hotute'n hma an la a, khawvela la awm ngai lo, a awm leh ang em tih pawh hriat loh, an lal ṭhuthleng an hlan a, rorelna mamawhte hnenah an pe a ni," a ti a; chumi avang chuan Mizoram chu ram rálmuang ber a nia sawiin, Pathian programme anga lal ṭhutthleng ken hlâwkzia an hre tawh tih a sawi.
Health minister Lal Thanhawla pawhin thu sawiin, CM kaihhruaina hnuaiah kawng tam takin hmasawnna a awm zel tih sawiin, "Chu'ng zinga ropui ber pakhat, Mizoram tana mél lung pawimawh tak medical college hial kan han nei hi a ropui tak zet a ni," a ti a; MIMER a hlawhtlin theih nana thâ leh zung, thiamna leh ngaihtuahna sengtu zawng zawng chungah lawmthu a sawi.
Lal Thanzara chuan, MIMER kal zel dan turah hmabak a la thui hle tih sawiin, "Thla tin MCI duh dan leh tih tur min tukte kan puitlin zel a ngai dawn a, medical college kan din tawh, tiin thâ kan thlah mai thei lo a, châwl loa hna kan la thawh zel a ngai dawn a ni," a ti a; MIMER a changtlun zel theih nan mawhphurtu zawng zawngte ngaihtuahna thar nen hma la chhunzawm zel turin a chah.
Health Minister chuan, MIMER director te, zirtirtute leh thawktu dang zawng zawngte chu MIMER tan theihtawp chhuah tura ngenin duhsakna a hlan a; MBBS zirlai batch hmasa berte chu an zirlaiah ṭha taka an tih theih nan duhsakna a hlan a ni.
MIMER-a thawkte
Professor - 4
Associate Professor - 4
Assistant Professor - 31
Senior Resident - 10
Demonstrator - 14
Junior Resident - 17
Registrar - 1
Asst. Registrar - 1
Finance Officer - 1
Veterinary Officer - 1
Nursing Superintendent - 4
Ward Superintendent - 31
Staff nurse - 141
Lab. Technician - 24
Lab. Assistant - 9
CSSD Technicians - 4
Audio-Visual staff - 1
Photographer - 1
Group-D staff - 46