National Handloom Day hman a ni

Nimin khan Assembly Annexe Conference Hall-ah National Handloom Day hman a ni a, khuallian Commerce & Industries minister H Rohluna chuan handloom-ah nasa takin Mizoramin hma a sawn thu a sawi a, "Department leh weaver-te bakah hemi lama inhmangte ṭhahnemngaih vang a ni," a ti.

Mizo hnam ro pawi­mawh kawr leh puante chawilarin state pawn lam, a bik takin hmarchhak state dangah Mizo mipuiin hriat kan hlawh phah tih sawiin H Rohluna chuan, "Chemical hmanga la siam chawp acrylic yarn aṭanga natural fibre-a inleh a ṭul hle a, rawngah pawh natural dye hman uar deuh deuh a ṭul," a ti a, kan puan tahte Mizoram chhung leh hmar chhak state mai bakah ram chhung hmun dangte leh ram pawn thlenga thawnchhuah tlaka buatsaih a ṭul thu a sawi

Commerce & Industries Minister chuan August 17, 2018-ah handloom industry neitute leh weaver-te tan Thenzawlah motivation campaign buatsaih tum a nih thu sawiin, "Hetah hian hetiang lama ei­zawngte a tam thei ang ber kal tura sawm an ni. National Handloom Day hi infuihtharna atana hman ṭul," a ti a, handloom a hmalatu kalkhawmte chu an tawn hriat aṭanga ṭhangthar, bul ṭan ve mekte kawhhmuhtu nih tum turin a chah.

Thusawitu dang, Co­mmerce and Industries director J Hmingthanmawia chuan puantah chu Mizo culture nena inzawm tlat, eizawnna hlawk a nih bakah hnam ziarang pholangtu pawimawh tak a nih avangin original design kan neihte hi kan hlut thiam a pawimawh tih sawiin, "Kan hnam rohlute a bo loh nan ṭan kan lak a ngai a ni," a ti.

Inkhawmah hian ‘In­troduction of natural fibres, traditional design and motifs’ tih thupui hmangin C.Lalthlenmawia’n thu a sawi.