Inpumkhatna leh hmasawnna rualkhai a awm theihna atan INC hi din a ni - R Romawia
Aizawl North-I bialtu MLA R Romawia chuan Indian National Congress (INC) chu India rama inpumkhatna leh hmasawnna rualkhai a awm theihna atan din a nih thu a sawi.
Tun hnaia a bial chhung Leitan YMA Hall-a mithar lawmluh inkhawm a hmanpuinaah thu sawiin R Romawia chuan, "Mi ṭhenkhatin Congress sawi chhiatna atana 'Vai Pawl' an ti ṭhin hi an hriatchian loh vang a ni. Kumpinu-in India a awp lai kum 1885-ah INC hi India hnam a din chhuah theih nana din a ni. Ram mipui zawng zawngin zalenna an hmuh a, miretheite khai chhuak tur te, sakhaw zalenna leh intluktlanna a awm theih nana he pawl hian hma a la ṭhin," a ti.
R Romawia chuan INC hruaitu hmasa Jawaharlal Nehru leh Mahatma Gandhi-te pawhin inpumkhatna leh hmasawnna rualkhai a awm theihna atan nasa taka hma an lak ṭhin thu sawiin, "INC hi zalenna sualchhuaktu ni satliah mai loin, mipui intluk tlanna duhtu, sakhaw tin zalen taka an awm a, rualkhai zawka mipuiin hmasawnna an dawn theih nana hmalatu pawl a ni," a ti a, Mizorama an party hotute pawhin mipui hamṭhatna an duh avangin lalṭhutthleng an ken thu a sawi.
Aizawl North-I Congress tarlan danin, inkhawmah hian R Romawia hian political party hrang hrang aṭangin mi 165 an party-ah a lawm lut.