Channa la thehlut lo

Gauhati High Court (GHC), Aizawl Bench-in NLUP hnuaia beneficiary thlan dan kalphung (guidelines) a neih leh neih loh a zawh chungchangah Mizoram sorkarin chhanna an la thehlut lo.

Vanglaini palai zawhna chhangin, sorkar ukil Samuel Vanlalhriata chuan chhanna an la thehluh loh thu hi a sawi a, "Mizoram sorkar aṭangin chhanna kan la dawng loa, chhanna kan dawn velah Court-ah kan thehlut ang. Kar li chhung hun pek kan ni a, tunah kar khat pawh a la liam loa, thil hmanhmawh thlak a la ni lo," a ti.

Tarlan tawh angin, Mizoram sorkarin NLUP dawngtu tur thlangtu tur a ruat dan chu GHC, Aizawl Bench-ah complaint a nih avangin, Court chuan August 3, 2018 khan kar li chhung NLUP sem tawh hrih lo tur leh insawifiahna thehlut turin Mizoram sorkar a hriattir a ni.