Covid-19: Vei mek 26, vei tawh lo 134

July 1, Nilaini khan Mizoramah Covid-19 hripui vei hmuh chhuah a awm lo. Mizoramah Covid-19 hripui vei mi 160 hmuh chhuah a ni tawh a, chu'ng zinga mi 134 chuan vei tawh loin, mi 26-in an la vei mek. Vei tawh mi mi 134 zinga 126-te chu enkawl an nihna hmun aṭangin dam takin an chhuak tawh.

SRH-ZMC Covid-19 Bulletin nimina chhuakin a tarlan danin, July 1 khan ZMC Laboratory-ah mi 382-te swab sample endik a ni a, an vaiin hripui an vei lo vek. District aṭanga sample an endikte chu - Aizawl 195, Lunglei pahnih, Champhai 66, Kolasib pakhat, Serchhip panga, Lawngtlai 69, Mamit pakhat, Saitual pahnih, Khawzawl 19 leh Siaha 16 bakah, State Referral Hospital (SRH)-a awm sa paruk a ni. Nimin khan sample eng emaw zat endik leh a ni bawk.

Nilainia sample endika Covid-19 vei lo tih finfiah zingah hian, hripui vei hmuh chhuah tawh Khawzawl district pahnih pawh an tel a; anni pahnih nen hian Covid-19 vei tawh lo zat chu mi 134 an ni ta. Mi 26-in an la vei mek thung a, chungte chu Aizawl, Lunglei, Siaha, Champhai leh Mamit district mite an ni.

Covid-19 vei tawh lo hmuh chhuah tawhte zinga mi pathum chu nimin khan Dedicated Covid Health centre (DCHC) aṭangin chhuahtir an ni a; chu'ngte chu Serchhip district-a nufa leh Lunglei district tlangval pakhat an ni. Heti hian hripui vei dam tawh mi 126 chhuahtir an ni tawh a, Covid-19 vei tawh lo tih finfiah tawh DCHC/CCC-a enkawl mek mi pariat an la awm.

Mizorama district 11 zingah Hnahthial district-ah Covid-19 vei hmuh chhuah a la awm lo a; Kolasib, Serchhip, Lawngtlai, Saitual leh Khawzawl district-ahte vei an awm tawh rih lo bawk.

Nimin khan Covid-19 vei rinhlelh thilah SRH-ah mi dah luh niin, ICU-ah enkawl nghal a ni a, swab sample pawh lak nghal a ni. SRH-ah hian hripui vei mi 54 enkawl an ni tawh a, pasarih enkawl mekin, mi 47 an chhuak tawh a ni.