A ṭul chuan cluster chairman nihna Ka kiansan ngam - Dr. Lalmalsawma

MPYCC president Dr. Lal­malsawma chuan NLUP ṭanpuina dawng tura thlante chu a dawng awm tak zel an nih thu sawiin, " A ṭul chuan cluster chairman nihna ka kiansan ngam," a ti.

Nimina Dinthar Venga mithar lawmluh inkhawm buatsaihah thu sawiin Dr. Lalmalsawma chuan, "NLUP in a tum ber chu mi harsa leh retheiten lei rem an rah ve theih na tura an eizawnna siamsak a ni. Retheihna leh harsatna hian political party a hre ve loa, tuchungah pawh thleng thei a ni. Opposition party-te'n Congress mi leh sa chiahin NLUP an dawng an tih ṭhin hi a dik lo tih hrechiangtute chu anmahni vek an ni," a ti a, NLUP chu party dang pawhin pek awm hlir an pe tih party dang pawhin an pawm a rin thu a sawi.

MPYCC President chuan NLUP High Court-a khing anih chungchang sawiin, "Kan hotuten cluster chairman-ah dan ang thlapin min ruat ve a, amaherawhchu kan hmingte a lo lan ve avang leh chhuanlam eng eng emaw vangin, tute emaw High Court thleng an kal hi a pawi ka ti. Cluster chairman ka lo nih ve avanga mi harsa leh rethei tak tak ṭanpui ngai em em ten an eizawnna bulṭanna tur NLUP te a khawtlai phah hi a pawi ka ti. NLUP a hun taka an dawn theihna tur anih phawt chuan cluster chairman ka nihna pawh hi kiansan ka inhuam reng a ni," a ti.

Dr. Lalmalsawma chuan eptu MLA-te chu NLUP ngaisang leh sem ve chakah puhin, "NLUP hlawhchhamzia leh policy ṭha lo anih zia au au pui ṭhinte vawi­inah chuan a sem chak ber berah an ṭang a, lawmawm kan ti hle," a ti a, eptu MLA-te chu Congress polic pawm a, an party-a lut ve turin a sawm.

Congress tarlan danin, nimin inkhawmah hian MNF aṭangin voters 22, ZNP aṭangin voters pathum leh neutral 10 an vaiin voters 35 Congress party-ah lawm luh an ni.