Sorkarna kan chan chuan thuneihna kan sem zai ang - PRISM President

PRISM chuan nimin khan khan Champhaiah district hqrs. pisa an hawng a, thusawitu an president Vanlalruata chuan sorkarna an chang chuan thuneihna an sem zai tur thu a sawi.

Vanlalruata chuan party ṭhenkhatin sorkarna an siam tawh laiin, ṭul nia an sawi thuneihna semzai chu an kalpui leh ngai chuang lo tih sawiin, "An sawi hi ṭul an tih vang ni loin mipuiin kan duha an ngaih vangin an sawi mai mai tih a chiang. Tunah pawh thuneihna sem zai chu kan sawi ṭheuh a, mahse keini party tih loh party dang chuan an pawl chhungah thuneihna an semzai chuang lo," a ti.

PRISM President chuan an party chuan hqrs.-te thuneihna vawrtawp pein candidate pawh an kutah an dah thu sawiin, "Kan sorkar hunah pawh thuneihna hi kan sem zai dawn chiang a ni, " a ti a, Mizoramin hma a sawn chak theih nan MLA inthlanah mipui­in mi dik lo kan hnawl ngam a ṭul thu a sawi.