Maha sorkar hnathawkten nawrh huaihawt

Maharashtra-ah state sorkar hnuaia hnathawk, mi nuai 17 te chuan Seventh Pay Commission hman phutin nimin aṭang khan ni thum awh tur nawrh an huaihawt ṭan.

Thawhṭanni zan khan sorkar chuan thla 14 atana Dearness Allowance (DA) arrear tihkhawtlai sak chu pek a tiam thu a sawi vangin, nimin khan sorkar hnathawkte nawrh huaihawtna aṭang hian gazzeted officer nuai 1.5 vel chu an inhnukdawk leh nghal a ni.

Hemi zan veka Government Resolution (GR) tihchhuahah, 7th Pay Commission chu nakkum January thla aṭanga hman ṭan a nih tur thu tarlan a ni.

Sorkar hnathawkte hian an hlawh tihsan an phut bakah, kar khata ni nga hna thawh leh pension kum kum 58 aṭanga kum 60-a tihsan an phut a, heng an thil phutte hi Diwali hunah ngaihtuah a ni dawn niin official chuan a sawi. Hnathawkte arrear chu August thla hlawhah pek tel an ni dawn tih a sawi bawk.

Government Employees Organisation president Nitin Sardeshmukh chuan central sorkar hnuaia hnathawkte chuan kum 2016 aṭang khan 7th pay commission hi an hmang tawh a, state pasarihin an hmang tawh bawk niin a sawi. Maharashtra state sorkar hnuaia thawkte chuan sixth Pay Commission hman a nih aṭang khan arrear pawh an la la lo niin a sawi.

Sardesmukh chuan an state-ah class III leh class IV post ruak nuai 1.85 zet a awm niin a sawi a, compassionate ground-a hnawhkhah tur post 30,000 zet pawh sorkar chuan ala pawm duh lo a ni, a ti. Hospital leh department pawimawh dangahte post 30-40% vel hnawhkhah loin a la awm mek tih a sawi bawk.