Sumdawng hausa Stan Kroenke kutah Arsenal

Arsenal-a neitu nihna nei tam ber Stan Kroenke chuan Alisher Usmanov chanpual (share) chu pound maktaduai 600 in a lei sak dawn. Nimin khan an inrem tawh - North London club hlutna hi pound tluklehdingawm 1.8 zet tihna a ni.

American sumdawng hausa tawntaw Kroenke hian a company Kroenke Sports & Entertainment (KSE) kaltlangin Arsenal hi 67% zet a nei tawh sa a, Alisher Usmanov chanpual 30% a neih belh chuan mimal kuta la awm ngai lo Gunners hi a pum hmawm thei dawn.

KSE chuan thuchhuah siamin, "Ruahmanna fel tak nen hmalam panna tur a ni. Arsenal-in ngelnghet taka Premier League leh Champions League nomawi a chawi theih nan hma a la dawn a, nomawi lian dang bakah hmeichhia leh naupang lam thlengin hmasawna leh hlawhtlina thlen a tum," an ti.

American company hian 2011 aṭanga thuneihna a chan hnem hnuah hmalam a pa nasat thu sawi zuiin, "Player lian lak, player contract leh inkhel ve kher lo hna thawk tan sum a hmang hnem a, he club hi sang taka awmtir a tum," tiin an sawi.

Season hmasa tawp hma deuhin Arsene Wenger-a'n kum 22 a chamchilh tawh Arsenal a chhahsan tur thu a tichiang tawh a, amah thlaktu Unai Emery kaihhruaina hnuaia an league match hmasa ber atan Pathianni zan hian Manchester City an hmachhawn dawn - manager leh neitu thar hnuaiah bung thar an kai dawn.

Club neitu KSE lamin an hna thawh an chhuang a, hmasawn pawh an tum. Amaherawhchu, Arsenal Supporters' Trust (AST) lam erawh an lawm lo. Nimina inremna an siam hi 'Lungngaihna ni' tiin an sawi ve thung.

AST chuan thuchhuah siamin, "Stan Kroenke-a'n club a neih pumhlum tak avangin, fans lamin ṭhahnem ngai taka a thawh ṭhinna chu a pawimawh lo sawt dawn tih a hriat theih," an ti. AST hian an club lei nan Kroenke hian loan a hmang tih an sawi lang tel bawk. Club chu sumdawnna ni loin, dik leh ṭha takin inelna thianghlim tak hmachhawn zel turin an duh a ni.