District hrang hrangah zirlaibu sem

Samagra Shiksha hnuaiah nimin khan Kolasib, Siaha leh Lawngtlai district-ahte kum 2020-21 atan pawl 1-8 zirlaibu ṭhahnem tak sem a ni.

Zirlaibu a thlâwna sem turte hi primary school zirlai naupang pakhatah Rs. 250 man leh middle school zirlai naupang pakhatah Rs. 400 man zela hisâp a ni a; sem chhuah tâkte hi sikul tin thleng turin Village Education Committee (VEC)-te hnenah pek tur a ni.

Siahaah chuan nimin zing dar 7 khan bawrhsap Bhupesh Chaudhury-a'n New Siaha High School kawt aṭangin a vailiam a; DC chuan, tunlaia Covid-19 vanga hun rei tak zirna khaihlak chu zirlaite'n rilru hnual nan hmang lo se a duh thu sawiin, "Nikum aiin kan result-ah hma kan sawn hret a, kan hmasawnna hi chhawm nung zel turin zirtirtu leh zirlaite'n ṭan i la zual sauh ang u," a ti.

Siaha district khaw hrang hranga sem tur zirlaibu hi bu 16,000 chuang a ni a, district chhunga cluster 11-ah an dah ang a, chuta ṭang chuan khaw tinah an sem leh dawn a ni. Kolasib-ah pawh district bawrhsap Dr H Lalthlangliana, District Education Committee chairman ni bawkin Samagra Shiksha district project pisa tual aṭangin a vailiam. Bawrhsap chuan, lehkhabu chhiar tam a pawimawh a, a ṭangkai thu sawiin, "Thiamna tak tak nei tur­in lehkhabu ngei chhiar a ngai," a ti a; lehkhabu chhiar tama ṭan la turin zirlaite a chah.

Kolasib district-a zirlaibu sem zat tur chu Mizo medium-ah 7,074, English medium-ah 1,457, Nepali medium-ah 70 leh Bengali medium-ah 91 a ni. Lawngtlaiah chuan zirlaibu hi zing karah Lawngtlai Press Club-ah sem chhuah a ni a, district bawrhsap leh District Education Committee chairman Dr Andrew H Vanlaldika'n sikul hotute hnenah a hlân. Dr Andrew H Vanlaldika chuan, zirna chu kawng tinrênga hmasawn nan thil pawimawh ber pakhat a nih thu sawiin, "Lawngtlai district-a zirna siamṭha turin theihtawp chhuaha ṭan lak a ṭul," a ti a; an district-a School Education department-a thawkte chu ṭan la thar turin a fuih.

Lawngtlai district-ah hian Block Resource Centre (BRC) pali leh Cluster Resource Centre (CRC) 19 a awm a, primary school 226 leh middle school 155 a awm. Primary school-ah zirlai 9,493 an awm a, middle school-ah zirlai 6,820 an awm bawk.