MJA-in Golden Jubilee an lawm ṭan

Mizoram Journalists' Association (MJA) chuan nimin khan district hrang hrangah an kum 50-na, golden jubilee lawmna hawnna leh jubilee meidêt leh lung phun hun an hmang.

MJA General Headquarters, Aizawl chuan Aizawl Press Club-ah jubilee hawnna leh meidêt inkhawm an hmang a, MJA president hmasa ber Dr Lal Thanhawla'n hmanpuiin, jubilee mei a dêt a ni.

Aizawla jubilee lawmna hawn inkhawm hi MJA Gen. Hqrs president Zonunsanga Khiangte-in a kaihruai a; khuallian Lal Thanhawla chuan, Mizorama chanchinbu hun hmasa lamah chuan editorial neih nacháng hre lo an ni fur tih sawiin, "Tunah chuan chanchinbu ṭha tak tak, editorial leh article ṭha tak tak neite a awm a, a lawmawm ka ti a, a enkawltute hnenah lawmthu ka sawi a ni," a ti.

Dr Lal Thanhawla chuan, Mizorama chanchinbu hmasate chu political party aṭanga tihchhuah a ni fur tih sawiin, "Tun hma chuan duh loh zawng kan sawi chhe vak vak a, duh zawng kan fak vak vak ṭhin. Tunah chuan changkang tak tak, chhiar tlak tak tak a ni tawh a, a enkawltute pawh mi thiam tak takte an ni," a ti a; sapṭawng chanchinbute a awm tawh chu hmasawnna a nih thu leh, amah pawhin Assam Tribune-ah staff reporter niin a ziah ve ṭhin thu a sawi.

Mizo ṭawng chu mawi tak leh hausa tak a nih thu sawiin Lal Thanhawla chuan, "Ṭawng upate hi kan nei ṭha em em. Ṭawng dang hi kan uar lutuk em aw, ka ti a, uar loh deuh a ṭhain ka hria, kan ṭawngah hian kan fimkhur ta lo hle," a ti a; chanchinbumite chu Mizo ṭawng uar zel tura chahin, "Kan ṭawng min ngaihsantir leha min thiamtirtu atan chanchinbute hi a ṭangkai ber pawl niin ka hria a, Mizo ṭawng dik tak ṭhangtharte'n an hman theih nan chanchinbute'n kaihruai ṭha se ka duh hle," a ti.

MJA President hmasa ber chuan, MJA-in kum 50 a tling ta chu a lawmpui thu sawiin, ram leh hnam tan tluang taka kal zel turin duhsakna a hlàn a ni.

MJA general secretary Zohmingmawia tarlan danin, MJA-ah hian Mizoram pumah member 195 an awm mek a, chu'ng zinga mi 92 chu Aizawl district-a mite an ni a; prominent journalist atan mi 12 an puang tawh a, chu'ng zinga mi pakua chu an la dam.

MJA hi March 23, 1972-ah din a ni a, golden jubilee lawmna pui ber chu kumin March 23-ah an hmang dawn a ni.

MJA Office Bearer hmasa berte
President - Lal Thanhawla,
Editor, Mizo Aw
Vice President - C Chhunbura, Hmar Arsi
Treasurer - Lalbuaia, Editor, Mizo Arsi
Secretary General - RK Pautu
Secretary - Biaksanga