Rilru fím taka Omicron hmachhawn ṭul - Health Minister
State Level Expert Committee on Covid-19 Management chuan Health minister Dr R Lalthangliana hoin nimin khan Secretariat conference hall-ah Omicron hmachhawn dan tur an sawiho. Minister chuan, Omicron chu chî-âi loa rilru fím taka hmachhawn a ṭul thu a sawi.
Dr R Lalthangliana chuan, Covid-19 hrik thar Omicron-in Mizoram a hnaih tawh hle tih sawiin, "Hmachhawn tura kan inpuahchah ran a ngai. Chief minister Pu Zoramthanga nen kan sawi dun tawh a, a rang thei ang bera political party leh tlawmngai pawlte nen inràwn tlànna neih kan tum," a ti.
Minister chuan, JICA aṭanga sum hmuh vbc. 500 sênga Cancer Superspeciality Hospital sak tur chu a tak ram chang turin hna a ṭan theih tawh thu sawi.
Ṭhutkhawmah hian India ram páwn leh ram chhung hmun dang aṭanga Mizorama rawn lut/ hawte swab sample endik leh inkhung hran dan tur te, hripui veite enkawl leh sûlhnu chhui dan tur te, mahni ina inenkawl (home isolation) chungchangte sawiho a ni a; rawtna an neihte chu sorkar thuneitu sangte hnenah thlen a ni ang.