AH&Vety Minister-in Union Minister hnenah Mizoram mamawhte a thlen

Animal Husbandry and Veterinary (AH&Vety) minister Dr K Beichhua chuan nimin khan Guwahati-ah Union minister for Fisheries, Animal Husbandry & Dairying Parshottam Rupala a kâwm a, Mizoram mamawh hrang hrang a thlen.

Dr K Beichhua hian nimin khan sàwm a nih angin Guwahati-ah Assam sorkar leh National Dairy Development Board-in thawhhona thuthlung an ziah a hmanpui a, programme kárlakah Union Minister nen an inkâwm a ni.

Union Minister hnenah hian Dr K Beichhua chuan Re-Aligned National Livestock Mission chungchang te, AH&Vety Infrastructure Development programme, Livestock Health chungchangte leh Dairying Development Programme chak leh hlâwk zawka Mizorama kalpui dan turte a sawipui a ni.

Union Vety Minister chuan Dr K Beichhua thu thlente chu a theih anga a bawhzuisak tur thu sawiin, NBBD hotute chu a ṭul anga MULCO hmasawnna tura thiamna ngaite leh thurawnte pe a, chhawmdawl turin a hrilh nghal.

Dr K Beichhua chuan, African Swine Fever vanga department hriatpuinaa vawk an suatte zangnadawmna pek chungchang pawh a sawi chhuak a, Parshottam Rupala chuan tihfel thuai a nih tur thu a lo hrilh a ni.