KHAWTHLIR

MPSC exam result
Mizoram Public Service Commission chuan nimin khan November 24, 2021-a Mizoram Civil Services (Combined Competitive) Preliminary Examinations, 2021 an buatsaih result an tichhuak a, main examination hmachhawn turin mi 424 tlingin, an zinga pathum chu person with disability (PwD) quota-a tling an ni. He exam hi mi 3,619-in an hmachhawn a, chu'ng zinga mi 3,581 chuan an hmachhawn tluan a ni. Tun ṭumah hian MCS 15 (PwD quota 1), MPS 8, MFAS 8 leh MIS 4 lak a ni dawn.

CM Relief Fund
Chief Minister's Relief Fund for Covid-19 ah January 6, Ningani thleng khan Rs 31,36,41,467 a lut tawh. Committee on Utilization of Chief Minister's Relief Fund-in an rêl angin Rs 29,70,30,470 hman a ni tawh a, hman loh Rs 1,66,10,997 a la awm a ni.

Heroin man
Excise & Narcotics department chuan January 6, Ningani zan dar 9:30 khan Serchhip leh Keiṭum inkar kawngpuiah heroin gram 27.83 leh a neitua puh Lalrotluangi (43) d/o Biaktluanga (L), Serchhip Chhimveng nia inchhál chu an man a, nimin zing khan Lalrotluangi hnen aṭang thoin heroin gram 247.100 an man leh bawk. Heroin neitu lakah hian Narcotic Drugs & Psychotropic Substances Act, 1985 Section 21(c) tlawhchhanin thubuai ziah luh a ni.

Tui lak zirho
Irrigation & Water Resources (IWR) minister C Lalrinsanga chuan nimin khan Administrative Training Institute (ATI) auditorium-ah Block Agriculture & Irrigation Development Committee (BAIDC) Sensitization Training a hawng a, training-a telte chu an mawhphurhna leh chanvo tihlawhtling ṭheuh turin a chah. Training hi IWR secretary J Hmingthanmawia'n a kaihruai a, district hrang hranga IRW, Agriculture, LRSWC leh Horticulture department aiawhte an tel a ni.