District-ah MJA golden jubilee lawm a ni

March 23, 2022 hi Mizoram Journalist Association (MJA) kum 50-na, golden jubilee a ni a, nimin khan district hrang hrangah jubilee khuhhawnna hun hman niin, jubilee mêi an dêt.

Lungleiah chuan MJA jubilee lawmna hun hi Lunglei Press Club-ah buatsaih niin, Lunglei District MJA treasurer Laltlanthanga’n a kaihruai a; president H Lalthansanga’n jubilee hriatrengna lungphun a hawn hnuah, vice president Lalrintluanga Khiangte-in jubilee mei a dêt a ni.

Jubilee lawmpuina atan minister Dr R Lalthangliana’n Rs 5,000, NYK hotu Mercy Sallate-in Rs 2,000 leh Lunglei IPRO C Lalremruati'n water filter Lunglei MJA hnenah an hlan.

Champhaiah chuan golden jubilee lawmna hun hi Champhai Press Club-ah hman a ni a, Champhai District MJA vice president Lalhlupuia’n kaihruaiin, khuallian Champhai chief judicial magistrate Lalramsanga’n jubilee mei a dêt.

Kolasib-ah pawh Press Club-ah hman a ni a, an district-a MLA pathum - K Lalrinliana, Lalrinsanga Ralte leh K Laldawngliana te bakah, bawrhsap Dr H Lalthlangliana ten an hmanpui.

Serchhipah chuan bialtu MLA Lalduhoma hoin MJA golden jubilee hi lawm ṭan a ni a, ṭhuang hniha hun hman a ni. Chhunah Serchhip Press Club-ah hun hman a ni a, zanah Tarpi Tlangah Bialtu MLA-in jubilee meichher a dêt.

Mamit leh Lawngtlaiah chuan zanah jubilee mei an dêt a ni.