Serchhip College lawmpui

Serchhip DC Kumar Abhishek chuan nimin khan DC meeting hall-ah tun hnaia NAAC grade A hmu thar Serchhip College lawm­­puina a buatsaih a, principal Lalremsiama hnenah lawmpuina thuchei a hlân.

Kumar Abhishek chuan, Serchhip College-in India rama college ṭha berte zinga mi ni phâk khawpa hma a sawn chu lawmawm a tih thu sawiin, “Thawktu zawng zawng ka lawmpui tak zet. District tan hmasawnna ropui leh chhuanawm tak a ni a, Mizoram hmun dangte leh state dang aṭang pawha rawn pan tlak zirna-in ṭha a ni tawh a ni,” a ti a; hma lam pan zel tum tur leh mamawh an neih an ngaihtuahpui theih chi apiangah pui tura a inhuam thu a sawi.

December 2021 thla tàwp lam khan National Assessment and Accreditation Council (NAAC) Peer Team chuan Serchhip College an endik a, January 4, 2022 khan tehna chi sarihah point 3.18 hmuin, grade A an kai thu an hriattir a ni. Grade hi kum nga chhung a dam ang.