Ramria Covid-19 swab test dan sawiho

Nimin khan Home minister Lalchamliana hoin Secretariat conference hall-ah Mizoram Police, Assam Rifles leh Border Security Force hotute an ṭhukhawma, ramria Covid-19 swab test leh screening kalpui dante an sawiho.

Home Minister chuan, Covid-19 chi thar Omicron darh chak dan thlirin, ram dang nena inrina kâna Mizorama lutte chu a theih chin chinah Covid-19 an vei leh vei loh endik a, an hriselna dinhmun chîk taka enfiah a ṭul thu a sawi a, “A ṭul chuan dah hran a pawimawh. Ram dang nena kan ramri aṭangin Omicron a darh loh nan a ṭul anga hmalak dan tur ngaihtuah hi kan ṭhutkhawmin a tum ber a ni,” a ti.

Chief secretary Renu Sharma chuan, Covid-19 léng thawh thumna thleng thei dinhmun thlirin Mizoram luhkáa kaihhruaina hman mek chu tihdanglam a nih thu sawiin, “Health department-in uluk takin dinhmun an thlithlai reng a ni,” a ti a, ruahmanna awm sate a ṭul anga thlak an neih thu a sawi.

Ṭhutkhawmah hian Police, Assam Rifles leh BSF hotu lute chuan, hripui a darh loh nan ramria hma an lak dante an sawi. Indo-Myanmar ramri vengtu Assam Rifles hotute chuan, ráltlân rawn lutte chu enfiah an ni a, an luhna khaw mite nen an inchiahpiah loh nan hun eng emaw chen khung hran a ṭul thu sawiin, “VTF-te nen thawhhona ṭha neih a pawimawh,” an ti.

Assam Rifles hotute sawi danin, tunlaia ráltlân rawn lut tam ber chu Siaha district-a Zawngling kaltlangin a ni a; ramri kânna hmun panga/parukah uluk leh zuala enfiah a ṭul thu an sawi a ni.

Indo-Bangladesh ramri vengtu BSF hotute chuan, ramri kânnaa rawn lut report an neih loh thu leh tun dinhmunah an ruahmannate a ṭha tâwk a, harsatna a awm loh thu an sawi.

Ṭhutkhawmah hian Myanmar ramri dep district - Siaha, Lawngtlai, Champhai, leh Hnahthial bawrhsapte’n video conferencing kaltlangin Myanmar raltlante hriselna dinhmun leh Covid-19 vaccine pek tawh zatte an tarlang.

Myanmar ráltlân rawn lutte’n Covid-19 an put darh loh nan a ṭul anga ruahmanna siam leh duang turin Home Secretary kaihhruaina hnuaiah Assam Rifles, Police, Health & Family Welfare leh DMR department, Siaha leh Champhai DC telna committee din an rêl a ni.