Kuminah Covid-19 vei ni tin an pung

January 6, Ningani khan Mizoramah Covid-19 vei mi 579 hmuh chhuah a ni a, kumin bikah hripui vei mi 2,247 hmuh tawh niin, ni tin a pung. Nimin khan hripui vei dam tawh mi 250 chhuahtir an ni a, Covid-19 vangin mi pakhat a thi.

Covid-19 vei hmuh thar 579-te chu mipa 241 leh hmeichhia 338 an ni a; ZMC laboratory-a hmuh 18, TrueNAT hmanga hmuh 17, RAT hmanga hmuh 538 leh FIA hmanga hmuh paruk niin, positivity rate chu 9.72% a ni.

Ningania Covid-19 vei hmuh chhuah mi 579 zingah symptom nei mi 427 awmin, 73.75% a tling a, mi 152 erawh chu symptom nei lo an ni thung.

Swab sample endikna district 11 zingah positivity percentage 10% aia a sànna district panga a awm a, a sànna ber Serchhip district-ah 28.43% a tling. Positivity rate 10% chung lam district dangte chu Khawzawl 28.26%, Champhai 23.44%, Mamit 15.76% leh Hnahthial 14.68% a ni a; Lawngtlai district-ah hmuh a ni lo.

Thingtlang khua zinga positive hmuh tam zualnate chu - Dilkawnah 63 symptom nei vek, Darlakah 56 symptom nei vek, East Lungdarah 36, Bungtlangah 35, Cherhlunah 22 symptom nei vek, Sailulakah 21 leh Serkhanah 17-te a ni.

Nimin tlai dar 5 thleng khan hripui vei dam tawh mi 250 chhuahtir an ni a; district tina chhuak zat chu - Aizawlah 74, Serchhipah 67, Mamitah 44, Khawzawlah 19,Lungleiah 16, Champhaiah 14, Siahaah pasarih, Saitualah panga, Kolasib-ah pathum leh Lawngtlaiah pakhat a ni.

IDSP record angin, Mizoramah Covid-19 vei 1,43,772 hmuh chhuah a ni tawh a, mipa 69,165 leh hmeichhia 74,607 an ni. Nimin tlai dar 5 thleng khan mi 1,40,450 (97.69%) chhuahtir an ni tawh a, mi 555 (0.39%) thi tawhin, enkawl mek mi 2,767 (1.92%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 1,43,772 chu mi 1,000 zelah hripui vei mi 131 an awm ang a ni a; mi 1,00,000 zela Covid-19 vangin mi 50 an thi tawh ang a ni tih sorkar thuchhuakin a tarlang.