Covid-19 inkaihhruaina thar a chhuak ; Zanah kohhran inkhawm phal a ni lo

Mizoram State Disaster Management Authority hnuaia State Executive Committee chuan nimin tlai khan January 8-31, 2022 chhunga Covid-19 kaihhnawiha khawsak dan tur kaihhruaina, standard operating procedure (SOP) a tichhuak a; zan lamah kohhran inkhawm phal a ni lo a, zan curfew kalpui chhunzawm zel a ni dawn.

SDMA SEC chuan, "Tun hnaiah hri nasa taka a darh bakah, positivity rate pawh a sang hle tih zirchianna aṭangin finfiah a ni a. Chuvangin, Mizorama Covid-19 léng mek bakah, a aia hlauhawm zawka sawi Omicron darh zel tur vèn nan inkhuahkhirhna khauh zawka siam ni se tiin thutlukna an siam a ni," a ti.

Inkaihhruaina thara a lan danin, Mizoram pumah zan dar 9 aṭanga zing dar 4 inkarah curfew puan chhunzawm tur a ni a; chhunah chiah biak-ina leng zat zatvein inkhawm phal a nih bakah, inkhawmah zaiho phal a ni lo. HSLC leh HSSLC exam tur zirlaite tih loh zirlai dang tan zirna-in leh hostel-te hawn phal a ni lo a, online hmangin zirna kalpui tur a ni.

Aizawl páwn lamah chuan DC-te'n an district dinhmun a zirin inkaihhruaina an siam dawn a ni.

AMC area-a inkaihhruaina ṭhenkhat
• Loh theih loh thilah lo chuan páwn chhuah leh inlênpawh loh tur.
• HSLC leh HSSLC exam turte tan sikul leh hostel hawn phal, sikula thawkte vaccine full dose lâk vek tur.
• Training institute-ah a zatvea kal phal.
• Inneih inkhawm leh mitthi vui inkhawm a hmuna leng zat zatvein phal a ni a, ei leh in sem phal loh.
• Picnic spot, movie theatre, park, sahuan, gym, spa, beauty parlour, a huhoa páwn chhuah phal loh.
• Infiamna phal a ni a, indoor-ah mi 20, outdoor-ah mi 50 aia tam loin.
• Insawizawi phal a ni.
• Lu mehna dawr hawn phal a ni.
• Mipui punkhawm phal loh a ni a, pawimawh bikah sorkar phalna lain a theih thung.
• Hna thawh phal a ni.
• Dawr hrang hrang hawn phal a nih rualin, bazar leh dawrkaite inhawn chhâwk dan tur ruahman tur.