Alternative Dispute Resolution Centre hawng

Alternative Dispute Resolution Centre thar, New Capital Complex-a mi chu nimin khan Gauhati High Court judge leh Mizoram State Legal Services Authority-a executive chairman Justice Michael Zothankhuma'n a hawng.

Justice Michael Zothankhuma chuan, ADR Centre chu thubuai remna court chi khat Lok Adalat hmanga thubuai rêl felna hmunpui tur a nih thu a sawi a; thubuai remnaah Lok Adalat a ṭangkai thu sawiin, "Kum kal ta 2021 chhung khan thubuai 1,389 lai Lok Adalat-ah rêl fel a ni a, thubuaiin a ken tel sum leh pai hlut zawng settled amount pawh Rs 28,75,99,619.32 a ni," a ti.

Lok Adalat-in bank loan rûl ṭha lote leiba tam tak a ṭhìn chhuahsak ṭhin thu sawiin Michael Zothankhuma chuan, "Mimal sum inpûktir leiba tam tak a ṭhìn chhuahsak ṭhin. Thubuai chi hrang hrang a rèl theih zingah compoundable criminal case-te pawh a tel a ni," a ti a; ADR Centre chu mediation mechanism hmanga thubuai chinfelna tur a nih tel thu leh Supreme Court duh dan ang thlapa trained mediator-te an neih theih hunah mediation hmanga thubuai rel hna thawh tur a nih thu a sawi.

Justice Michael Zothankhuma chuan, ADR Centre chu Legal Services Authority kaihhruainna hnuaia kal tur a nih thu sawiin, mipui hriat tur dan leh hrai a tam thei ang ber inhrilhhriat a kalpui mek a nih thu a sawi a; mipui hnena dan leh hrai zirtir nan seminar leh awareness campaign-te huaihawt ṭhin a nih thu a sawi bawk.

ADR Centre hawnna inkhawm hi Mizoram State Legal Services Authority member secretary R Vanlalena'n a kaihruai a; Gauhati High Court judge pahnih Justice Nelson Sailo leh Justice Marli Vankung-te pawhin thu an sawi a ni.