Mizorama mau chî kûi ṭiah State pawnah thawn chhuak
King Industries, Aizawl chuan nimin khan mau chî an kui ṭiah chu Reva Flora Culture, Madhya Pradesh-ah an thawn. King Industries hian mau chî hi Falkland Veng leh Kawnpuiah an kûi ṭiak a ni.
Vanglaini palai zawhna chhangin King Industries hotute chuan, "Mau chi thum - Moso, Dendrocalamus Membranceus leh Gigenteaus kan kui ṭiak. Nimina kan thawn chhuah hi chu Moso a ni a, ṭiak 100 kan thawn phawt a, a dang pawh kan rawn lei vek ang an ti," an ti a; Arunachal Pradesh leh Mumbai aṭangte pawhin order a awm a, Covid-19 vangin duh anga an thawn chak theih loh thu an sawi.
King Industries hotute chuan, Mizoram páwn leh chhungah Covid-19 lèn hma chuan an mau kui ṭiahte an hralh reng thu sawiin, "A ken a buaithlak avangin ṭum khatah hralh ṭeuh a har. Kan mau ho hi industry base-a ti kan ni ber a, a lian chi a ni. Moso hi China hoin an uar hle a, mau bikah chuan an hausak phahna ber a ni," an ti.