ECI-in Bru camp-a electoral roll ennawn Buatsaih turin Mizoram sorkar a hriattir ; NGO-te leh political party-te'n an remti lo

Election Commission of India (ECI) chuan Tripura relief camp-a Bru-te tan an awmna hmuna electoral roll ennawnna (revision) buatsaih turin Mizoram sorkar a hriattir. Hetih lai hian, All NGO leh political party-te chuan Mizoram páwna electoral roll revision tih an duh loh thu an sawi nawn.

ECI thupek thar chungchang hi nimin khan Mizoram sorkar buatsaihin Secretariat conference hall-ah sorkar official, NGO leh political party aiawhte'n an sawiho. Inkhawm kaihruaitu, Home minister R Lalzirliana chuan, Mizoram chhungah ngei Bru rawn kîr leh duhte tan Summary Electoral Roll Revision leh vote thlak chu sorkar dinna leh duh dan a nih thu a sawi.

Home Minister chuan, chief minister Lal Thanhawla'n Ministry of Home Affairs (MHA) leh ECI hnenah lehkha a thawn tawh a, Mizoram mipui leh sorkar duh dan a thuhmun tih chiang taka a ziah thu a sawi a, "Mizoram chhungah ngei roll revision leh vote thlak chu Mizoram sorkar duh dan a nih thu sorkar laipuiah thlen a ni tawh," a ti.

R Lalzirliana sawi danin, Chief Secre­tary leh Home Secretary-te pawhin Bru refugee camp-a electoral roll revision neih leh Mizoram chhung ngeia vote thlaktir chungchang chu ECI hotute vawi thum sawipui a ni tawh. ECI thutlukna hnuhnung berah chuan Bru-te tan roll revision chu an awmnaa tih a ni ang a, vote erawh Mizoramah an thlak tura tih a ni.

Home Minister chuan, ECI thu thar chu Mizoram sorkar duh dan ni lo mah se, inthlang ram kan nih angin inthlanna kaihhnawiha thuneitu sang ber ECI thupek angin Mizoram sorkarin hma a lak a ngai tih a sawi.

Inkhawmah hian sorkar laipui bultuma Tripura rel;ief camp-a Bru-te Mizorama hruai kîr chungchang sawihona buatsaihah Mizoram aiawha tel ṭhin Home secretary Lalnunmawia Chuaungo leh additional secretary Lalbiakzamate chuan meeting an thu sawi ṭhin hrang hrangte an sawifiah.

Meeting-a tarlan danin, July 3, 2018 khan sorkar laipui, Mizoram sorkar, Tripura sorkar leh Mizoram Bru Displaced Peoples' Forum (MBDPF) te chuan inremna thuthlung an ziak a; inremna angin Mizoram sorkar chuan September 2018 ral hmain Bru hruai kîr hna thawh zawh a nih theihna atan action leh movement plan a siam a ni.

ECI duh dan angin Bru lak lêt chu August 14, 2018-ah ṭan tur a ni a, September 10, 2018-ah zo hman tura ruahman a ni. Road Map-IV angin chhungkaw 3,455 lâk let lehna atana sum mamawh zat MHA-a thlen chu cheng vbc. 68.60 a ni. November 2016-ah Bru enfiah (indentification) tih a nih hnuah Bru lak let tur zat chu chhungkua 5,407 a ni a, sum mamawh zat a pun avangin senso zat tura ngaih cheng vbc. 68.60 bakah, cheng vbc. 21.3 belh leh niin, MHA-ah thlen a ni tawh.

ECI-in Tripura relief camp-a Bru-te tana electoral roll revision neih loh a remti avangin, Bru-te Mizorama an kîr huna electoral roll revision buatsaihna hun a awm theihna atan hruai kîr hna thawh dan tur pawh ruahman a ni a; mahse, tun hnaiah ECI-in relief camp-ah roll revision nei turin Mizoram sorkar a rawn hriattir leh a ni.

Hetih lai hian, Bru hruai kîr tura hmalakna kal zelah vawiin hian Home secretary Lalnunmawia Chuaungo hoin sorkar official-te'n thil pawimawh thawk turin Damcherra, Tripura an pan dawn a; Central YMA presi­dent Vanlalruata pawh a kal ve leh dawn.

NGO Coordination Committee leh political party hrang hrangte chuan, November 6, 2015 khan Tripura refugee camp-a Bru awmte tana Special Summary Revision of Electoral Roll neih a nih lohna atan a ṭul anga hmalakho an rel tawh a; an thurel bawhzui hian NGO hruaitute chuan sorkar laipuia thuneitute Delhi-ah an lo hmu tawh a ni.

Vanglaini palai zawhna chhangin Cen­tral YMA president Vanlalruata chuan, November 6, 2015-a an thutlukna chu NGO leh political party-te dinna a nih thu a sawi a, "Kan ngaihdan hi Mizoram sorkar buatsaiha official, NGO leh political party aiawhte inràwn khawmna vawiin (August 8, 2018)-a buatsaihah pawh kan dinna ngaia kan la din thu hi kan thlen a ni," a ti.