Vawiin aṭangin No Teaching Day
Mizoram Government Aided School Association (MIGASA) chuan, lumpsum grant-in-aid middle school leh high school 62-te adhoc grant-in-aid dinhmuna dah tura sorkar an ngenna tihhlawhtlin phûtin vawiin aṭang hian 'No Teaching Day' an hmang dawn a, sikul kal siin class an la dawn lo.
MIGASA hian August 3, 2018 khan No Teaching Day hman an tum thu hi an lo puang tawh a; MIGASA General Assembly-in a lo rel tawh angin, adhoc grant-in-aid-a min hlangkai tura an ngennaah tun thlengin sorkar aṭanga thu lawmawm an la hriat loh avangin lumpsum M/S leh H/S 62-ah No Teaching Day hi an hmang dawn ta a ni.
MIGASA president C Lalngaihzuala chuan Vanglaini palai zawhna chhangin, No teaching Day hi August 9-17 chhung an hman phawt dawn thu leh, chumi chhunga sorkar aṭanga thu lawmawm an hmuh loh chuan an kal zel dan tur an la ngaihtuah ṭhat dawn thu a sawi.
An duh leh beiseite chu tihhlawhtlinsak ngei tura sorkar an ngen thu tarlangin MIGASA chuan, "No Teaching Day hnua thu lawmawm kan la hre lo fo a nih chuan kan kal zel dan tur chu a tlachawpin rêl chawp zel ni se kan ti. General Assembly chuan No Teaching Day-in awmzia a neih loh chuan sikul khâr ni se tih a lo rel tawh a ni," an ti a ni.