Aizawl East-I Block ZPM-in K Sapdanga A tlinna atan theihtawp chhhuah an tum

Aizawl East-I constituency huam chhunga Zoram Peoples' Movement (ZPM) block pathumte chuan nimin Ṭhuampui Community Hall-ah Joint Block Conference an hmang a; resolution pass in. 'Kan bialah K Sapdanga thlan tlin a nih ngei theihna atan theihtawp chhuah chhunzawm zel ni se,' an ti.

Conference hmanpuitu ZPM chief ministerial candidate Lalduhoma chuan, Congress leh MNF party-te chu mipuite'n an chawlh a hun an tih tawh thu sawiin, "Ram tana an ngaih pawimawh zawngte tihhlawhtlinna hun kan pe tawh a, an tih theih chin kan hmu tawh," a ti a; ZPM chu mipui duh dan tihlawhtling tura ding a nih thu a sawi.

Lalduhoma chuan, MNF leh Congress chu party ṭha tak an nih thu a sawi rualin, "An sorkar leh chuan an chief minister tur kan hria, anni pahnihah hian mipuiin beisei an nei tawh lo. Hetiang a nih avang hian MNF ni lo, Congress ni lo tih a lo ngai ta a ni. ZPM hi kan ṭhang duang hle a ni," a ti.

ZPM CM Candidate chuan, ZPM-te chu leader-ah an buai ring an awm thu sawiin, "Tunah kan buai lohzia a lang tawh a, leader-a kan buai loh avangin mi tam takin min rawn zawm a ni. Symbol-a kan buai ring an awm leh a, tunah chuan common symbol hmang turin thutlukna kan siam fel tawh," a ti a; ZPM chuan buaina tur an neih tawh loh thu a sawi.

ZPM senior vice president Vanlalhlana pawhin thu sawiin, MNF leh Congress sorkar Mizo­ramin hun eng emaw chen a hrawn tawh thu a sawi a, "A tu emaw zawk zawk chu ṭha se ZPM a din a ngai lo ang. An party hming inang lo mah se, ze khat nei an ni. Congress leh MNF President-te chu Court thubuai nei tawh ve ve an ni," a ti.

ZPM aṭanga Aizawl East-I viltu K Sapdanga chuan, "He bialah hian ZPM-in hnehna a chan ngei ka beisei. Hnehna kan lo chang ta a nih chuan bial chhunga ṭhahnemngai taka thawktute thawhrimna Pathianin a malsawm a ni ang. Block pathuma hruaitute an ṭang rual em em a ni," a ti a; East-I huam chhunga block hruaitute ṭanrualna anga ṭanrualna ṭha a la hmuh ngai loh thu a sawi.

K Sapdanga chuan, Aizawl East-I chu Mizoram union territory lai aṭangin rulling party-te bial a nih deuh char char thu sawiin, "Rulling bial an ni ṭhin chungin mipuite zingah sorkar tui la in ngai lo pawh chhiar tham an la awm. Kan bial tluka khawvar hun nghakhlel kan awm lo. Sorkar tharah chuan khàma kal ngai loin, step-in a tlawh kimna veng nih ve kan duh a ni," a ti.

Inkhawm hi APM Aizawl East-I South Block chairman KC Lallianmawia'n a kaihruai a, North Block chairman Lalnelawma'n inlawmna thu sawiin, Central Block chairman C Laltlanmawia'n lawmthu a sawi thung.