India leh Myanmar inremna hawn a ni

Rih-Zokhawthar kana inkalpawhna chungchanga India leh Myanmar sorkarin inremna, Agreement on Land Border Crossing with Myanmar hawnna hun nimin khan Rih-Zokhawthar border-ah buatsaih a ni a; Myanmar-a Chin state chief minister Salai Lian Luai leh Mizoram sorkara Co­mmerce & Industries minis­ter H Rohluna ten an hawng.

Chin chief minister Salai Lian Luai leh Mizoram Commerce & Industries minister H Rohluna te hian ram pahnih inkarah mu­mal taka inkalpawhna tihhlawhtlinna leh entirna'n Rih Sector Indo-Myanmar Border Trade Point Zo­khawthar Bridge chu kê-in an zawh a ni.

Zokhawthara Land Cus­tom Station Hall-ah in­khawm tawi buatsaih a ni a; Salai Lian Luai leh H Ro­hluna te chuan, India leh Myan­mar sor­kar hmalaknaa ramri inkal­pawhna tur inremna mumal tak siam a ni chu lawmawm an tih thu leh, ram pahnihte inkarah inlai­chinna ṭha tak siamtu a nih ngei an beisei thu an sawi.

India leh Myanmar sor­karin tun hnaia ramri kâna inkalpawhna kawnga in­remna an siam ang chuan, Rih-Zokhawthar hmuna inkalpawhna atana hman mekah ramri aṭanga boruaka km. 16 huam chhung chu ram pahnih tan awlsam taka inkalpawh theih a ni a; Rih-Zokhawthar Border Trade Point chu ram dang mite tan passport leh visa hmanga luh leh chhuahna hmun, international point atana ruat a ni.

India sorkar chuan Myanmar ram chhunga inkalpawhna siamna tur atan lei pahnih, Indo-Myanmar Friendship Bri­dge, Zokhawthar tihchang­tlunna tur leh Myanmar ram chhunga Byawnu luia lei dawh turte zirchianna leh endikna nei turin Central Road Research Institute mithiamte a tír a, nimin khan endik ṭan niin, vawiinah endik chhunzawm a ni ang.