KHAWTHLIR

Zirlai chawimawi
Behliangchhip MZP, Tripura chuan Thawhlehni zan khan an YMA Hall-ah Jampui tlangdunga Mizo zirlaite chawimawina hun an buatsaih. An hun hmanpuitu, minister of state Vanlalawmpuii Chawngthu chuan, Jampui Mizote chu hnam dang kara awm an nih angin ram darthlalang an nih thu a sawi a, upa zahna te, inngaihtlawmna leh tlawmngaihna nen Mizo nun ze mawi chawi nung zel turin a chah. Zirlai chawimawite hi pawl 10 pass thar 28 leh pawl 12 pass thar 38 an ni.

Mamitah Job Mela
MzSRLM leh DRDA, Mamit bultumin mnimin khan Mamit Chhimveng Hall-ah Job Mela buatsaih a ni a, Mamit DRDA project director R Vanlalsawta'n a hawng. Job Mela hi Mamit district-a ṭhalai hna zawng mekte tana buatsaih a ni a; MzSRLM thawhpui Mission Movement-in ṭhalaite interview neiin hna hrang hrang atan an la a, ṭhalai 350 chuang leh nu leh pa eng emaw zatin an chhim a ni.

GST training
Taxation department chuan vawiin hian officer-te tan an auditorium-ah Goods & Service Tax (GST) chungchang­ah zirhona, 'Training on Legal Issues under GST' an buatsaih dawn a, sorkar ukilte'n thupui an sawi ang.

Checkgate tlawh
Central YMA Kumpuan Committee chuan vice president R Lalngheta hoin nimin khan Vairengtea Police checkgate leh sorkarin Temporary ILP centre a siamte an tlawh a, Vairengte Joint YMA hruaitute'n an ṭawiawm. CYMA hruaitute hian ILP pek chhuah dan leh National Register of Citizen (NRC)-in nghawng a neih dante an zir chiang a ni. Vairengte checkgate-ah hian July 2018 chhung khan hnam dang mi 8,522 hnenah temporary ILP pek niin, August 1-8 chhungin mi 1,996 hnenah pek a ni bawk.

Class tan
Mizorama medical college hmasa ber, MIMER-ah chuan nimin aṭang khan orientation class ṭan a ni. College registrar Dr Jane R Ralte hnen aṭanga thu dawn danin, MBBS zirlai batch hmasa berte chu ni nga chhung orientation class neihpui phawt an ni ang. A bul ṭanna hun hi Health secretary Lalrinliana Fanai leh MIMER director Dr L Fimate ten an hmanpui a ni.