Kum chanve chhungin END-in Khehpuam mûm 11,07,000 man

Excise & Narcotics department-a officer-te chuan nimin khan an commissionerate-ah Crime Review Meeting an nei a; he hunah hian, kumin 2018 kum chanve (January-June) chhungin khehpuam (pseudoephedrine) mûm 11,07,000 an man thu leh NDPS Act hnuaia thubuai 249 ziah luh a nih thu an tarlang.

Crime Review Meeting hi Excise & Narcotics commissioner Ngurchungnunga Sailo-in a kaihruai a; ruihhlo leh a kaihhnawih khuah­khirhna dan, The Narcotics Drugs & Psychotropic Substances Act 1985 (NDPS Act) leh Mizorama zu khuahkhirhna dan, The Mizoram Liquor (Prohibition & Control) Act 2014 (MLPC Act) kenkawhna kawngah hmalaknate an thlirho a ni.

Meeting-ah hian, zu leh ruihhlo man vanga Court-a thawnte chungah an tihsual ang phû tâwka judge-te leh magistrate-te'n hremna an lekkawh ṭhin avangin lawmawm an tih thu an sawi a; kumin kum chanve chungin thubuai nei zinga 90% aia tam zawk chu Court-in thiam loh an chantir (convict) tih an tarlang.

Hetih rual hian, Mizo mipui, a bikin ṭhalai ruihhlo ti mekte leh la ti lote hnenah ruihhlo hman sual pawizia hriattirna (awareness) a tam thei ang ber neih dan tur an sawiho a; ruihhlo do kawngah tlawmngai pawl hrang hrang te, srkar department dangte leh para-military force-te nen ṭha taka an thawhho ṭhin avangin lawmawm an tih thu an sawi bawk.

Meeting-a tarlan dan­in, January-June 2018 chhung khan Excise & Narcotics department hian pseudoephedrine (khehpuam) mûm 11,07,000, heroin kg. 4.179 leh ganja kg. 147.536 an man a; ruihhlo kaihhnawihah mi 329 manin, NDPS Act hnuaia thubuai 249 an ziak lut a ni.