Champhaiah Edufest buatsaih a ni

Champhai Vengthlang Branch YMA chuan nimin khan Awmpui Pheiah Edufest 2018 an buatsaih a, bialtu MLA TT Zothansanga'n a hawng. Edufest hi vawiin leh naktukah chhunzawm a ni ang.

TT Zothansanga chuan, Edufest chu zirna kawngah ṭhalaite harh tharna thlentu ni se a duh thu a sawiin, "Mi taima leh thawk rimte chauhin hlawhtlinna an chan ṭhin avangin theihtawp chhuah a ngai. Nu leh pate'n zirna senso atan ṭhahnemngai taka thawkin sum tam tak an seng ṭhin tih zirlaite’n an hriat a, taimakna nena chhàn lêt ve a ngai a ni," a ti.

Zirlaite fuihna sawitu Lalnghinglova Hmar, Vanglaini joint editor chuan, hna chu sorkar hna ang chauha hrilhfiah a nih chuan lehkhathiam narân tan hna thawh tur a awm tawh lo tih sawiin, "Champhai hi sumdawnna hmunpui a nih avangin mi hausa pawh an pung zel a, mahse, zirna lama tlakhniam chuan hausaknain awmzia a neih chuang lo," a ti a; zirlaite chu hausakna aia thiamna zawng hmasa zawk turin a chah.

Edufest pual hian stall hrang hrang buatsaih a ni a, zawhfiah duh leh harsatna neite tan councelling class buatsaih nghal a ni.