Commerce & Industries hmalakna thlirho

Commerce and Industries minis­ter Dr R Lalthangliana hoin nimin khan Secretariat conference hall-ah Commerce & Industries department hotute'n an hmalakna leh hma­chhawpte an thlirho.

Dr R Lalthangliana chuan, Co­vid-19 vangin khawvelah harsatna a thleng tih sawiin, "Hmasawnna hna thawh tak tak theih a ni lo. Amah­erawhchu, Covid-19 vanga mipui mimir health awareness-a kan harh mek te, HIV positive punna tlahniam te, faina kawnga kan ṭhangharh te, chetsualna tlahniam leh thil dang tam tak he harsatna phènah hian thil ṭha hmuh tur a awm a ni," a ti.

Commerce & Industries Minister chuan, an department hmalakna zauzia leh ken tel a ngahzia thlirin, department hnuaia hmalaknate a kal fuh chuan Mizo tan innghahna tlak eizawnna tam tak siam theihna a awm tih a sawi a, "Covid-19 vanga eizawnna hlohte leh eizawnna tur dap mek ṭhalaite tan food processing, handloom, textile, bamboo, mineral resource leh a dangte hmangin eizawnna tam tak siam belh theih a ni," tiin, officer-te chu ngaihtuahna séng turin a chah.

Commerce & Industries director J Hmingthanmawia chuan, inkhàrkhip vanga hna thawk thei lo, small & medium industry-te dam khawchhuahna tura sorkar laipuiin hmalakna thar a puante a sawifiah. Geology & Mineral Resources, ZIDCO, ZOHANDCO, MKVIB leh Bamboo Development Agency hotute'n an hmalakna leh hmachhawpte an tarlang bawk.