MLA Mavala'n Shillong MSU Freshers' Social a hmanpui

Mizo Students' Union (MSU), Shillong chuan August 7, Thawhlehni khan U So So Tham Auditorium, Shillong-ah Shillong-a Mizo zirlai awm tharte lawmna, Annual Freshers' Social vawi 39-na an hmang a, MLA Chalrosanga Ralte-in a hmanpui.

Chalrosanga Ralte chuan, taimakna tel loin zirnaah a hlawh­tlin theih loh tih sawiin, Shillong-a Mizo zirlaite chu taimakna, tumruhna leh huaisenna nei tlat turin a fuih a; tum neia lehkha zir a pawimawh thu sawiin, "Tui zawng leh zir tum chu inang lo mah se, mumal taka zirna kawng zawh a pawimawh," a ti.

Chalrosanga chuan, zirlai tan insûmtheihna leh mahni inthunun a pawimawh tih sawiin, "Tuna zirlaite hian tumruhna nen Central service leh all India service hrang hrangah tam zawk kan luh theih nan mahni kan infuiha ṭan kan lak thar a pawimawh hle a ni," a ti bawk.

Shillong MSU chuan, Shillong khawpuiah hian Mizo zirlai 3,000 - 4,000 vel an awm mek niin a tarlang.