Skill training turte tan counselling buatsaih
UDPA department chuan Central scheme a kalpui, DAY-NULM hnuaia ṭhalai tana skill training a kalpui turah nimin khan Chanmari YMA Hall, Aizawlah counselling an buatsaih a; khuallian Zodintluanga, UDPA minister chuan, Mizote'n a thlawna an dawnah tih mai mai leh kal paha tih an chìn thu sawiin, training turte chu anmahni tan a ni tih hriaa ṭan la turin a fuih.
Zodintluanga chuan, DAY-NULM hnuaia Mizo ṭhalai 1,300 rual a thlawnin sorkarin training a tumsak dawn tih sawiin, "An en zui (monitor) reng dawn che u a. He training hi keimahni tan a ni a, monitor kan ngai tur a ni lo. Training min petute hi kan nawr lêt zawk tur a ni. A thlawna training-ah hian sorkar min thawhpui u la, training partner-te nawr rawh u," a ti.
Training-ah exam a ni dawn tih sawiin Zodintluanga chuan, "Insawipui theih a ni lo, tih tak takna thinlung nen nangmahni eizawnna tur hi zir turin ka ngen a che u. Nangmahni, in chhung leh ram tan a ni," a ti a; mahni talent ngei hmanga eizawnna nei thei tur khawpa thiama inzir turin a fuih.
UDPA Minister chuan, DAY-NULM hnuaia training turte chu mithiamte'n an zirtir dawn avangin an vanneihzia hre turin a chah a, "Sorkar hna hi kan industry kan ti ṭhin a, tunah chuan sorkar hna hian a daih tawh lo. Kan talent neihna bika training kan neih theih hi innghahna tham a ni," a ti.
UDPA department-ah Urban Development (UD) lam chu mi hriat lâr zawk a ni fo tih sawiin Zodintluanga chuan, Aizawl leh district khawpui hrang hrangah nasa takin khawpui tihhmasawnna turin hmalak a nih thu a sawi a; chutih rualin, Poverty Alleviation lam an hlamchhiah lo a, mi rethei chawikanna lamah nasa taka hmalak a nih thu a sawi.
Zodintluanga chuan, Mizorama census town 23-ah in nei lo tan in 1,062 sak a nih tawh thu leh, in hmun nei si, in sakna nei lo chhungkaw sing chuangte ṭanpuina pek a nih tawh thu a sawi a, "SJSRY kan kalpui laiin BPL mi 17,806 hnenah skill training pek a ni tawh a, self help group (SHG) 1,100 kan nei a, SHG 678 hnenah interest subsidy loan pein, cheng nuai 1,034 vel pek chhuah a ni tawh," a ti.
DAY-NULM scheme hnuaiah hian ṭhalai 1,300-te training pek tur a ni a; chungte chu - electrician, driving, computer hardware, security, spa, beuaty therapy, female attendant leh a dangte a ni. Training hi vawiinah an ṭan ang.