Congress party-in MIMER din ropui an ti

Congress party chuan thuchhuah siamin, chief minister Lal Than­hawla kaihhruai Congress sorkarin Mizoram tana mél lung pawimawh Mizoram Institute of Medical Education and Research (MIMER) an din leh hawn a ni ta chu ropui an tih thu an tarlang.

MPCC chuan, "Mi dang tih theih loh, Mizoramin remna leh muanna a neih theih nana chief minister dinhmun kiana mahni sorkar nam thlu ngam Pu Lal Thanhawla bawkin Mizorama medical college hmasa ber leh awmchhun MIMER min pe leh ta a ni," an ti.

Kum 1993-1998 chhunga Congress party sorkar hmasak laiin Referral Hospital dinna atan cheng vbc. 40.53 hmuh a nih thu sawiin MPCC chuan, MNF leh MPC sorkar tharin awmze neia bul an ṭan lo lo a, MNF-in sorkarna kum 10 an chelh chhung­in cheng vbc. 78 chuang hmang siin an tipuitling lo tih an sawi a;

Congress sorkar erawh cuan Referral Hospital a tihpuitlin bakah, doctor zirna hmun atan a siam ta tih hre turin mipui an chah.

Congress party chuan, MIMER din a nih theihna tura nasa taka beitu - Chief Minister, Health Minister, Finance Minister leh Health department-a thawktute zawng zawng chungah lawmthu an sawi a; an hnathawh chu chhuanawm an tih thu an tarlang a ni.